BOBONARO, 06 fevereiru 2025 (TATOLI)—Governu liuhusi Sekretária Estadu Dezenvolvimentu Lokál, inaugura estrada rurál kompletu ho iluminasaun iha aldeia Taimea, suku Malilait, postu administrativu Bobonaro, munisípiu Bobonaro ne’ebé konstrui liuhusi Projetu Programa Nasionál Dezenvolvimentu Suku (PNDS).
Sekretáriu Estadu Dezenvolvimentu Lokál, Mateus dos Santos Tallo, informa Governu loke estrada ne’e atu fasilita movimentasaun komunidade nian loro-loron liuliu iha tempu udan.
Notísia Relevante: Governu presiza harii fatin hodi konserva restu mortál 197 iha Malilait
“Ita loke tanba tempu udan ita-nia komunidade labele asesu. Entaun, agora estrada di’ak ona ho iluminasaun sira-ne’e bele ajuda ona komunidade ba estrada boot tantu loron no kalan,” nia hateten ba ba jornalista sira, iha terrenu hafoin halo inaugurasaun, kinta ne’e.
Sekretáriu Autoridade Munisípiu Bobonaro ba asuntu Administrasaun no Finansa, Domingos da Costa, louva ho Projetu Programa Nasionál Dezenvolvimentu Suku (PNDS) tanba konsege rezolve ka hatán ona komunidade nia preokupasaun iha baze durante ne’e.
“Fatin oan ida-ne’e ema hotu-hotu preokupa tanba tempu udan ne’e susar la halimar. Tanba ne’e, agradese ba xefe suku Malilait nian ne’ebé helo planu hodi halo konstrusaun ba estrada rurál ida-ne’e,” nia dehan.Reprezentante komunidade aldeia Taimea, suku Malilait, Alfredo Magalhaes, hato’o agradesementu no sente kontente tanba Governu bele lori dezenvolvimentu hakbesik ba povu no povu bele sente.
“Ami-nia fatin ida izoladu no taho laran. Durante tinan barak, ami tebe fatuk, halimar taho, tempu udan iha lía ruma, ami-nia família sira lamas ain, hiit sinelus to’o iha ne’e mak tau fali sinelus iha. Maibé, ohin loron, ami la’o iha estrada kaber nia leten no iha tempu kalan ami la’o hateke sa’e ne’e ami la’o iha fitun ho fulan-nian okos, tanba kalan mós naroman ona,” nia dehan.
Estrada ne’e ho nia distánsia metru 200 ho iluminasaun ne’ebé monta iha dalan ninin sira-ne’e hamutuk unidade 15 inklui drainajen metru 170, moru satán rai metru 55 no obra ne’e gasta orsamentu totál rihun $44.
Notísia Relevante: Tempu bailoro, komunidade Mali-lait difisil asesu bee-moos
Jornalista : Sérgio da Cruz
Editór : Cancio Ximenes
