DILI, 07 Fevereiru 2026 (TATOLI) – Ajénsia Dezenvolvimentu Nasionál (ADN) no Komisaun Nasionál Aprovizionamentu (CAN, sigla portugés) organiza enkontru jerál hodi aprezenta dezempeñu serbisu instituisaun rua ne’e nian durante tinan 2024.
Diretór-Ezekutivu ADN, Lourenço da Costa, hateten sorumutu ne’e importante tebes, tanba bele fó sai progresu serbisu sira tinan kotuk nian no fó hanoin hikas ba dirijente no funsionáriu tomak ADN no CNA atu sai nu’udar baze ba dezenvolvimentu nasionál.
“Iha 2024, rezultadu serbisu verifikasaun prévia ne’ebé ita halo hahú husi Jullu 2023 to’o Dezembru 2024 mak totál projetu verifikasaun hamutuk 800, nia proposta orsamentu husi donu projetu hamutuk $806.060.524,02, rezultadu verifikasaun $697.553.956,43 no balansu ka poupansa ba Estadu hamutuk $108.506.567,59”, Rui Lourenço da Costa informa iha ámbitu aprezentasaun iha Sentru Konvensaun Dili, ohin.
Nia esplika katak projetu 800 ne’e, 285 mai husi 2023 nian ho montante orsamentu hamutuk $136.825.217,66. Nia rezultadu verifikasaun orsamentu hamutuk $120.658.116,74, balansu ka poupansa ba Estadu $16.177.200,92.
Ba 2024, iha projetu hamutuk 515 ho montante verba $669.235.206.36 no nia rezultadu verifikasaun husi ADN ho montante $576.895.839.69 no poupansa ba Estadu mak $92.339.366,67.
Projetu 2024 hamutuk 515 ne’e ba kategória sira mak hanesan projetu Fundu Infraestrutura iha 95, projetu liña ministeriál 149, projetu emerjénsia 259, husi Fundu Espesiál Dezenvolvimentu Rejiaun Administrativa Espesiál Oekusi haat, husi Fundu Espesiál Dezenvolvimentu Ataúru (FEDA) rua no subvensaun públika neen.
Kona-ba rezultadu inspesaun projetu 2024 nian hamutuk 807 – Fundu Infraestrutura iha projetu 369 ho nia montante orsamentu ba rekomendasaun pagamentu hamutuk $205.830.788,14; Fundu Espesiál Dezenvolvimentu RAEOA 44 ho totál orsamentu rekomendasaun ba pagamentu $8.032.690,77; Projetu liña ministeriál 284 ho totál verba ba pagamentu $28.042.048,66; Projetu Subvensaun Públika 110 ho montante ba halo pagamentu $3.041.123,17.
“Rezultadu inspesaun projetu 807 ne’e nia totál orsamentu ba kontratu projetu hamutuk $1.081.570.719,8, totál rekomendasaun pagamentu hamutuk $244.946.650,73 no totál orsamentu poupansa hamutuk $9.762.887,02”, nia informa.
Iha fatin hanesan, Adjuntu-Diretór Komisaun Nasionál Aprovizionamentu, Nélson Gusmão, hateten CNA nia misaun mak jere no implementa prosesu aprovizionamentu iha serbisu públiku ne’ebé konsistente ho ninia mandatu atu garante utilizasaun fundu públiku ne’ebé ktiterioza, ekonómiku no efisiente atu asegura aprovizionamentu públiku ne’ebé kompetitivu, transparante no imparsiál.
“Iha tinan 2024, númeru totál projetu ne’ebé tama iha CNA hamutuk 228 ho estimativa ba osan hamutuk millaun $491. Husi projetu 228 ne’e kontratu projetu 141 mak ezekuta ona, 65 iha prosesu no 22 kansela” nia subliña.
Ba 2023 nian, totál projetu ne’ebé CNA aprova hamutuk 51 ho estimativa osan millaun $416. Husi projetu ne’e, 24 ezekuta ona ho nia orsamentu millaun $49, projetu 16 iha hela prosesu no 11 kansela.
Nia esplika katak sumáriu ba atividade aprovizionamentu tinan 2024 ho totál projetu menus husi millaun ida ne’ebé konklui hamutuk 70, projetu la’o hela hamutuk 35, kansela hamutuk 16.
Ba projetu ne’ebé liu millaun $1 to’o 5, 65 mak konklui, 16 la’o hela 16, no haat kansela. Enkuantu projetu montante liu millaun $5 iha tinan 2024 mak konklui ona tolu no iha hela prosesu 14 no kansela rua.
Iha biban ne’e, Primeiru-Ministru, Xanana Gusmão, husu ba Ajénsia Dezenvolvimentu Nasionál no Komisaun Nasionál Aprovizionamentu kontinua kontrola projetu infraestrutura sira hanesan estrada atu garante nia kualidade ba tempu naruk.
“Ha’u fiar misaun Ajénsia Dezenvolvimento Nasionál no Komisaun Nasionál Aprovizionamentu. Imi tenke serbisu ho transparánsia no onestidade, lori dezenvolvimentu ba oin, tanba osan povu nian jere ho di’ak”, nia konklui.
Notísia relevante: PM fó atensaun ba servidór Estadu atu haree ba implementasaun kualidade projetu
Jornalista: Arminda Fonseca
Editora: Maria Auxiliadora
