DILI, 10 fevereiru 2025 (TATOLI)—Deputadu Opozisaun husi Frente Revolucionária de Timor-Leste Independente (FRETILIN), Antonino Doutel Sarmento, husu ba Governu tau ekipamentu modernu hodi promove joven nia talentu iha jogu boxe.
“Ita husu ba Governu atu tau-atensaun, liuliu atu halo dezenvolvimentu iha nível desportu atu tau ekipamentu sira ne’ebé mais modernu hodi promove ita-nia joven sira-nia talentu iha jogu boxe, ne’e ezije Governu atu halo investimentu ida di’ak ba futuru,” Deputadu hato’o liuhusi reuniaun plenária, iha Parlamentu Nasionál (PN), segunda ne’e.
Notísia relevante : Boxista Deniel “tuku monu” Sakti iha ronde datoluk
Reprezentante povu ne’e parabeniza boxista timoron na’in-rua husi El-Matador Boxing Club, Delio Mouzinho Anzaqeci no Daniel Assis Belo iha eventu Holywings Sport Show (HSS) Bali, Indonézia, iha 09 fevereiru kalan.
“Hakarak parabeniza timoroan na’in-rua, patriotizmu na’in-rua lori Timor-Leste iha mundu boxe ninian, irmaun Daniel ne’ebé hatún Sakti ho ronde tolu no irmaun Delio hatún Alisher ho segundu ronde. Ita hotu hateten Usbekistan país iha Médiu Oriente ida-ne’ebé halo investimentu boot liu iha ninia desportu mais moderna no ita hatene ninia boxista sira kuaze sai kampionatu mundiál, Timor-Leste foin tama iha sékulu XXI harii-an hanesan nasaun, maibé horikalan ita haree jogu ida ne’ebé Delio no Deniel hatudu, Timor-Leste ninia kualidade tékniku profisionál iha boxe, ne’e buat ida ita hotu merese hakruuk ba sira,” Deputadu Opozisaun apresia.
Notísia relevante : Xanana apoia boxista Delio-Daniel tuir kompetisaun HSS iha Bali
Biban ne’e, nia agradese ba timoroan sira iha rai-laran no rai-li’ur ne’ebé kontribui hodi boxista timoroan na’in-rua bele bele bá partisipa iha eventu ne’e.
Boxista Delio Mouzinho Anzaqeci, marka tan istória foun ba Timor-Leste iha mundu boxe bainhira tuku monu nia adversáriu husi nasaun Usbekistan, Alisher Ismailov iha ronde daruak, iha minutu 02,13.
Enkuantu, Boxista Deniel Assis Belo konsege tuku monu nia adversáriu Sakti Manulang, husi Indonézia iha rin leten iha ronde datoluk, iha eventu hanesan.
Jornalista : Nelson de Sousa
Editora : Julia Chatarina
