DILI, 10 fevereiru 2025 (TATOLI)–Deputada Bankada Governu husi Congresso Nacional da Reconstrução Timorense (CNRT), Cedelízia Farria dos Santos, preokupa ho ahi eletrisidade mate-lakan iha loron ikus, nune’e husu ekipa téknika husi Eletricidade de Timor-Leste, Empreza Públika (EDTL, E.P) atu rezolve.
“Ha’u kontinua lamenta ahi mate-lakan iha kapitál Dili nomós munisípiu sira hotu. Ami fahe esperiénsia foin lalais halo fiskalizasaun iha Ministériu Finansa ahi ne’e mate lakan hela de’it, ami preokupa tanba finansa iha sasan eletróniku barak, ita uza sistema online sira ne’e buat hotu konsentra ba eletrisidade, ha’u rona iha ne’ebá sira uza jeradór, maibé hanoin ho ahi mate lakan bele prejudika tebes ba serbisu hotu,” nia levanta liuhusi reuniaun plenária PN, segunda ne’e.
Nia nota, iha área Komora ahi sempre mate-lakan, nune’e bele estraga komunidade nia sasán eletróniku no prejudika negosiante kiik sira-nia atividade.
“Bisnis kiikoan sira fa’an ice cream, karamelu ne’e mós presiza eletrisidade, edifísiu boot nia bele iha jeradór, maibé ita-nia povu kiik nia bisnis kiik nia tenke lakon retornu ba loron-ida, favór tau-atensaun, lideransa Prezidente EDTL di’ak liu rezigna-an,” Deputada Bankada Governu lamenta.
Notísia relevante : Komisaun E rekomenda EDTL, E.P aselera projetu eletrifikasaun ba aldeia 15 iha Manufahi
Nune’e mós, Deputada Bankada CNRT, Aliança da Conceição Araújo, preokupa ho problema eletrisidade tanba bele difikulta servisu atendimentu públiku.
“Problema eletrisidade mate hanesan iha Aeroportu afeta tebes parte segel sasán, hasai foto iha imigrasaun, prosesu foti bagajen, no kondisaun rai manas, ida-ne’e kria imajen ladi’ak ba vizitante sira mai vizita ita-nia rai,” nia prekupa.
Nune’e, nia husu atu ministériu kompetente atu tau-atensaun tanba eletrisidade kontinua mate-lakan tanba halo manutensaun no troka fiu, maibé situasaun ne’e akontese beibeik ona seidauk rezolve to’o agora.
“Tanba ne’e husu ba Prezidente EDTL atu tau prioridade ba asuntu ne’e,” nia hato’o.
Deputadu Opozisaun husi Frente Revolucionária de Timor-Leste Independente (FRETILIN), Oscar Lima, haktuir, iha Ermera ahi mate la normál tanba to’o loron-tolu ka haat.
“Ida-ne’e problema ida sériu atu haree. Aleinde Dili, ahi mate oras ida ka rua lakan fali,” Deputadu katak.
Deputadu CNRT, Anacleto Freitas, husu atu tau-atensaun ba eletrisidade iha postu Lakluta, munisípiu Vikeke ne’ebé la lakan durante fulan-tolu ona.
Hatan ba kestaun ne’e, Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun sira no sei enkamiña ba entidade tutela hodi tau-atensaun.
Jornalista : Nelson de Sousa
Editora : Julia Chatarina
