DILI, 11 Fevereiru 2025 (TATOLI) – Prezidente Komisaun Ezekutiva Bee Timor-Leste, Empreza Públika (BTL, E.P), Gustavo da Cruz, hateten sira-nia parte sei rezolve, iha fulan ne’e, problema ne’ebé empreza Pelican Paradise hasoru, liuliu fornesimentu bee ba projetu ne’e.
Nia dehan BTL sei kanaliza bee ba projetu Pelican Paradise husi suku Tíbar munisípiu Likisá nian, tanba rekursu bee antes ne’e empreza sira ne’ebé halo projetu konstrusaun estrada Dili-Likisá mak halo prefurasaun ba posu ne’e. Depoizde ramata konstrusaun estrada, posu bee ne’e abandona, tanba ne’e BTL halo identifikasaun no halo teste katak bee ne’e iha kualidade hodi bele fornese ba projetu referidu.
“Maibé, difikuldade ne’ebé ita hasoru mak bee posu ne’ebé iha, harii iha rai privadu. Ita ko’alia ona ho Terra no Propriedade munisípiu Likisá halo ona aprosimasaun, ita prontu atu kompensa iha semana ida ne’e. Ita garante fulan ne’e sei dada bee ba projetu Pelican Paradise hodi sira hahú halo konstrusaun”, Gustavo da Cruz informa ba Tatoli iha Otél Novu Turizmu, ohin.
Dirijente ne’e garante katak fornesimentu bee ba Pelican Paradise ne’e la difisil, tanba kanu ba kanalizasaun iha ona, ne’ebé to’o iha Timor-Leste iha Juñu 2024.
Notísia relevante: Kanu dada bee ba projetu Pelican Paradise to’o ona Timor-Leste
Bee posu ne’ebé dada husi Tíbar bá Pelican Paradise ne’e maizumenus kilómetru 1,4 no bee ne’e empreza sei sosa kada metru kúbiku sentavu $0,20.
Rekorde katak iha entrevista ho Diretór Pelican Paradise Holdings Timor-Leste, Samuel Ong, hateten sira hein Governu Timor-Leste nia seriedade hodi rezolve obstákulu sira iha fornesimentu sistema bee-moos no eletrisidade tuir Akordu Investimentu Espesiál (SIA, sigla inglés) ne’ebé konkorda ona iha tinan 2022.
Diretór ne’e salienta katak kona-ba atrazu husi projetu ne’e, tanba kauza husi fornesimentu bee no eletrisidade, empreza husu ona kooperasaun no apoiu Governu nian ho pedidu depózitu millaun $180 hodi garante kompromisu Governu nian ba projetu ne’e.
“Tanba atrazu ne’ebé naruk, ami-nia finansiadór ezije depózitu Governu nian millaun $180 ho funan 4% kada tinan durante konstrusaun hodi asegura bee, enerjia, vistu no responsabilidade hotu ne’ebé hakerek iha akordu SIA nian. Osan ne’e sei reembolsa hafoin konstrusaun faze dahuluk remata”, Samuel Ong informa foin lalais ne’e ba Tatoli via rede sosiál, ohin.
Notísia relevante: Pelican Paradise hein Governu rezolve obstákulu sira tuir akordu investimentu
Jornalista: Arminda Fonseca
Editora: Maria Auxiliadora
