DILI, 24 Janeiru 2025 (TATOLI) – Empreza Pelican Paradise kontinua hein Governu Timor-Leste nia seriedade hodi rezolve obstákulu sira iha fornesimentu sistema bee-moos no eletrisidade tuir Akordu Investimentu Espesiál (SIA, sigla inglés) ne’ebé konkorda ona iha tinan 2022.
Diretór Pelican Paradise Holdings Timor-Leste, Samuel Ong, dehan kona-ba atrazu husi projetu ne’e, tanba kauza husi fornesimentu bee no eletrisidade, empreza husu ona kooperasaun no apoiu Governu nian ho pedidu depózitu millaun $180 hodi garante kompromisu Governu nian ba projetu ne’e.
“Tanba atrazu ne’ebé naruk, ami-nia finansiadór ezije depózitu Governu nian millaun $180 ho funan 4% kada tinan durante konstrusaun hodi asegura bee, enerjia, vistu no responsabilidade hotu ne’ebé hakerek iha akordu SIA nian. Osan ne’e sei reembolsa hafoin konstrusaun faze dahuluk remata”, Samuel Ong informa ba Tatoli via rede sosiál, ohin.
Tuir empreza nia esplikasaun, iha loron 01 fulan-Novembru 2024, depózitu sei rai durante fulan 60 durante períodu konstrusaun no manutensaun ho objetivu atu garante katak obrigasaun hotu-hotu Governu nian kumpre, liuliu iha estabilidade regulatória no fornesimentu infraestrutura nian.
Ida-ne’e inklui área krítiku sira hanesan bee, eletrisidade, no emisaun oportunu, autorizasaun ba lisensa sira, ne’ebé hotu-hotu esensiál tebes ba susesu konstrusaun projetu nian.
Notísia relevante: Governu seidauk kompleta fornese bee-moos no eletrisidade ba Pelican Paradise
Pedidu depózitu husi finansiadór sira ne’e, maske la halo parte husi Akordu Investimentu Espesiál orijinál ne’ebé asina ona entre Pelican Paradise no Governu, maibé depózitu ne’e ho intensaun atu reforsa kompromisu Governu nian ne’ebé aliña ho projetu nia eskala no objetivu ba tempu naruk.
“Pelican Paradise la buka finansiamentu adisionál husi Governu hodi finansia projetu ida ne’e. Ami asina tiha ona termu kompromisu ida ho ami-nia parseiru finansiamentu ba millaun $825, prontu no disponivel atu implementa ba ezekusaun projetu ne’e”, nia afirma.
Hodi hatutan katak informasaun hotu kona-ba finansiadór sira, inklui sira-nia rejistu, fahe ona ho Governu. Rekizitu finansiamentu sira mós fahe ona atu asegura buat hotu la’o ho di’ak. Dokumentu komprovativu kona-ba disponibilidade fundu finanseiru haruka ona ba autoridade relevante Governu nian.
“Informasaun hotu kona-ba finansiadór, inklui sira-nia rejistu, partilla hotu ona ho Governu atu asegura buat hotu-hotu la’o di’ak”, salienta.
Diretór Pelican Paradise hateten problema sistema bee-moos no fornesimentu eletrisidade ne’ebé Governu ladauk rezolve ne’e fó impaktu boot ba projetu ne’e iha Tíbar, Liquiçá.
“Progresu serbisu ba projetu Pelican Paradise iha Tíbar nafatin sei iha faze hanesan tinan kotuk, tanba difikuldade ne’ebé ami hasoru”, Samuel haktuir.
Nia salienta katak dezafiu rua kona-ba fornesimentu bee no eletrisidade ida-ne’e mós afeta ba konstrusaun Galeria Show Unit, ne’ebé lokaliza iha foho-lolon la’o tarde tebes.
To’o oras ne’e, Pelican Paradise hein nafatin desizaun no asaun ruma husi autoridade sira hanesan Bee Timor-Leste (BTL) no Eletricidade de Timor-Leste (EDTL) nomós ministériu sira ne’ebé iha ligasaun.
“Ami nafatin iha esperansa katak 2025 Governu bele rezolve, nune’e lori projetu ne’e ba oin”, nia espera.
Lembra katak Pelican Paradise Group simu ona sertifikadu Deklarasaun Benefísiu tolu ho fundu investimentu inisiál ne’ebé kompostu husi Pelican Ahava, Unip. Lda millaun $90, Pelican Elior Unip. Lda millaun $110 no Rezerva Pelican Adara millaun $1.
Projetu ne’e sei fó empregu ba ema na’in-1.500 durante konstrusaun no traballadór permanente na’in-1.300 hafoin konstrusaun no reflorestasaun ba área ne’e. Valór investimentu totál husi projetu ne’e kalkula besik millaun $700.
Notísia relevante: Pelican Paradise sei finaliza konstrusaun show unit gallery tinan ne’e
Iha estimativa katak 80% husi área totál sei hetan reflorestasaun no restaurasaun ambientál.
Projetu ne’e sei dezenvolve kompleta ho turizmu integradu, iha área ho totál maizumenus ektare 558, ne’ebé lokaliza entre Tasi-Tolu no Tíbar, ne’ebé sei inklui otél ida, kampu golfe, rezidénsia sira, sentru dezenvolvimentu juventude, eskola internasionál, ospitál internasionál no sentru komersiál tolu.
Lembra katak Prezidente Repúblika, José Ramos Horta, Primeiru-Ministru, Taur Matan Ruak, no Prezidente Pelican Paradise Datuk Dr, Edward Ong, asina plaka no halo lansamentu fatuk dahuluk, iha 25 Novembru 2022, ba futuru konstrusaun otél fitun lima ne’e, iha suku Tíbar, postu administrativu Bazartete, munisípiu Liquiçá.
Notísia relevante: PR no PM halo lansamentu fatuk dahuluk konstrusaun otél fitun-lima Pelican Paradise
Jornalista: Arminda Fonseca
Editora: Maria Auxiliadora