Governu aprova Kódigu Propriedade Industriál

DILI, 12 Fevereiru 2025 (TATOLI) – Konsellu Ministru aprova, ohin, proposta lei kona-ba Kódigu Propriedade Industriál, ne’ebé aprezenta husi Ministru Komérsiu no Indústria, Filipus Nino Pereira.

Lembra katak projetu proposta lei ida-ne’e hetan ona aprovasaun husi Governu iha loron 20 Marsu 2024 no haruka ona ba Parlamentu Nasionál maibé, durante prosesu lejizlativu, identifika ona nesesidade atu halo revizaun, nune’e diploma ne’e limitadu ba aspetu mínimu sira ne’ebé ezije husi kompromisu internasionál sira, ne’ebé lori ba elaborasaun proposta foun ida.

“Kriasaun Kódigu Propriedade Industriál hanesan rekizitu ida iha ámbitu adezaun Timor-Leste ba Organizasaun Mundiál Komérsiu (OMK) no integrasaun ba ASEAN”, sita komunikadu husi Governu.

Prosesu sira-ne’e ezije kumprimentu ba akordu OMK nian kona-ba aspetu Direitu Propriedade Intelektuál relasionadu ho Komérsiu (TRIPS) no armonizasaun ho dispozisaun sira husi konvensaun internasionál sira ne’ebé regula husi Organizasaun Mundiál ba Propriedade Intelektuál.

Kódigu Propriedade Industriál iha artigu 282, ne’ebé inspira husi direitu komparadu no kompromisu internasionál sira ne’ebé Timor-Leste asume ona, no hanoin kona-ba kestaun hotu ne’ebé relasiona ho propriedade industriál, ne’ebé fasilita kompriensaun no uza husi ema hotu iha sira nia atividade sientífiku, kreativu no ekonómiku, presiza atu uza kódigu ne’e.

Notísia relevante: Governu retira proposta-lei Kódigu Propriedade Industriál ne’ebé antes ne’e haruka ba PN

Jornalista: Arminda Fonseca

Editora: Maria Auxiliadora