Governu retira proposta-lei Kódigu Propriedade Industriál ne’ebé antes ne’e haruka ba PN
DILI, 01 outubru 2024 (TATOLI)—Governu hato’o karta ba Parlamentu Nasionál (PN) hodi retira hikas proposta-lei kódigu Propriedade Industriál ne’ebé antes ne’e haruka ba órgaun lejislativa ne’e.
Notísia Relevante: Komisaun D sei hala’o audiénsia públika ba proposta-lei Kódigu Propriedade Industriál
“Informasaun kona-ba retira proposta-lei númeru 8/VI(1a)-Kódigu Propriedade Industriál husi Governu,” Prezidente Parlamentu Nasionál, Maria Fernanda Lay, fó sai liuhusi reuniaun plenária Parlamentu Nasionál (PN), tersa ne’e.
Tuir karta husi Vise-Primeiru Ministru no Ministru Koordenadór asuntu Ekonómiku no Ministru Turizmu no Ambiente hato’o karta, ne’ebé Sekretária meza PN, lee sai iha sala plenária ohin, katak ho asuntu retira proposta-lei kona-ba Kódigu Propriedade Industriál iha sekuénsia aprovasaun husi Konsellu Ministru (KM), mediante ofisiu husi Primeiru-Ministru ba Prezidente Parlamentu Nasionál, ne’ebé envia ona proposta-lei kona-ba Kódigu Propriedade Industriál hodi hala’o diskusaun no aprovasaun.
Entretantu, liuhusi problema orden téknika relativamente opsaun normativa, nune’e lori naran Governu nian solita ba Prezidente PN aseita retira proposta-lei ne’e hodi aprefisionamentu nesesáriu no posteriór apresiasaun iha KM no envia versaun foun ba PN.
Notísia Relevante: KM aprova Kódigu Propriedade Industriál
Jornalista : Nelson de Sousa
Editór : Cancio Ximenes
