DILI, 13 Fevereiru 2025 (TATOLI)-Kombatente libertasaun nasionál na’in-11 husi Oekusi sei devolve rihun-$301 ba Estadu, tanba falsifika dadus veteranu.
Husi totál osan ne’ebé restitui husi na’in-11, na’in ida rihun-$31 no na’in-10 seluk kada ema fó-fila $27.000.
“Oportunidade ida-ne’e ami fó apresiasaun ba tribunál Oekusi ne’ebé hasai ona desizaun ba kazu falsifikasaun balun iha loron 13 Janeiru 2025”, Ministru Asuntu Kombatente Libertasaun Nasionál, Gil da Costa Monteiro, ba jornalista sira liuhusi konferénsia imprensa iha salaun MAKLN Komoro, ohin.
Oan Soru hatutan: “Falsifikasaun dadus hosi ema na’in-11 ne’ebé tribunál hasai tuir pena no lei ne’ebé iha hodi aplika ba ema sira-ne’ebé tama kategoria falsifikasaun dokumentu”.
Nia dehan, ema sira ne’ebé fó sasin ba na’in-11 ne’e mós tenke halo justifikasaun.
“Sira atu kadeia ne’e la’ós ministru nia kompeténsia, tribunál mak hatene prosesu”, nia realsa.
Nia fó ezemplu, iha veteranu ne’ebé falsifika dadus ne’e dehan CNRT mosu iha 1984, 1986, ida-ne’e signifika nia tama ona ba falsifikasaun tanba konta istória ne’ebé la-loos, públiku hatene momoos ne’e CNRT mosu iha tinan 1998.
“Ha’u alerta ba responsável iha munisípiu hotu, kuandu asina dokumentu ida atu aban-bainrua rekoñese ka la’e, husu atu haree didi’ak. Tanba Konsiensia sei kait ho verifikadór no responsável asina dadus ne’e.Tanba ne’e ho asuntu kombatente libertasaun nasionál nia-naran hakarak apresia ba kontribuisaun sira ne’e. Ida-ne’e mak ministru sempre apela husu atu koopera ho lei”, nia reitera.
Lei númeru 9/2009, 29 jullu, alterasaun dahuluk ba lei númeru 3/2006, 12 Abríl ne’ebé ko’alia konaba estatutu kombatente libertasaun nasionál iha artigu 19 (falsifikasaun) alínea 1) Ema ne’ebé fó deklarasaun ka informasaun falsu ka falsifika dokumentu sira relasiona ho prova ativizmu iha luta ba libertasaun nasionál ho objetivu hetan direitu konsagradu sira iha lei ne’e, hetan kastigu tuir lei haruka. Alínea 2) Bainhira aktu sira ne’ebé temi iha númeru anteriór ne’e Kombatente Libertasaun Nasionál mak hala’o, ne’e nafatin hetan kastigu tuir termu sira ne’ebé hatuur iha artigu 11.
Ministru ne’e mós informa konaba validasaun rejistu períodu daruak 2009-nian baze ba lei estatutu kombatente libertasaun nasionál.
Alterasaun datoluk ba lei númeru 3/2024, 12 juñu husi lei númeru 3/2006, 12 Abríl, artigu 13 (sertifikadu) esplika, rekoñesimentu ba kualidade kombatente husi libertasaun Nasionál depende ba rejistu, exetu ba sira ne’ebé jestaun superiór hosi estrutura ka organizasaun sira hosi rezisténsia tuir termu sira artigu 6, alínea b) hosi alínea 1 husi artigu 8 no artigu 9.
Notísia relevante: CCLN buka tuir nafatin veteranu falsu ne’ebé falsifika dadus
Jornalista : Osória Marques
Editora : Rita Almeida
