DILI, 11 dezembru 2024 (TATOLI)—Konsellu Dixiplinár iha Konsellu Kombatente Libertasaun Nasionál (CCLN, siglá portugés) kontinua buka tuir nafatin veteranu falsu sira-ne’ebé halo falsifikasaun dadus ba asesu simu pensaun, nune’e bele entrega ba parte justisa prosesa tuir lei ne’ebé iha.
“Serbisu barak. Ha’u labele dehan, ida-ne’e ami seidauk to’o faze finál, maibé konsellu disiplinár halo serbisu lubun ida no iha rejistu lubun kona-ba barak ne’ebé mak dehan falsifikasaun,” Prezidente Konsellu Fiskál Konsellu Veteranu iha CCLN, Angelo Godinho, hateten ba jornalista sira hafoin ramata audiénsia ho komisaun F iha Parlament Nasionál, kuarta ne’e.
Maibé, nia seidauk fó sai númeru loloos ne’ebé rejista tanba seidauk to’o faze finál.
Tanba ne’e, konsellu kontinua buka no identifika indivídu sira-ne’ebé falsifika dadus hodi hetan pensaun prosesa tuir legál.
“Serbisu boot sei halo nafatin, sei to’o ida por ida. Medida barak prepara tiha ona atu haree, maibé klaru ladi’ak hasoru nia konsekuénsia rasik. Timor iha lei define buat sira-ne’e, bainhira la la’o tuir dalan,” nia hateten.
Nia dehan, sansaun ne’ebé iha ba ema-ne’ebé falsifika dadus hodi hetan pensaun no iha akontese barak balun hapara pensaun no balun hetan kondenasaun husi Tribunál tama kadeia.
Notísia Relevante: MACLN identifika tan dokumentu veteranu falsu 3000-resin
Jornalista : Nelson de Sousa
Editór : Cancio Ximenes
