BOBONARU, 13 Fevereiru 2025 (TATOLI)–Koordenadór Eskola Ensinu Báziku Filiál (EBF) Mabil-Oa, suku Saburai, postu administrativu Maliana, Carmindo Lopes, husu ba Diresaun Servisu Munisipál Edukasaun (DSME) Munisípiu Bobonaru atu aselera implementasaun Programa Merenda Eskolár (PME) tinan 2025.
Notísia Relevante: Estudante rihun 29,078 iha Bobonaru sai benifisiáriu ba PME 2025
“Sira la husu maibé labarik sira-ne’e mai dadeer de’it tama tuku 08h00 ou tuku 09h00, sira tuur la metin tanba sente hamlaha. Entaun, ema loke kioske sira ba buka aihan ruma iha ne’ebá sosa de’it, tanba merenda eskolár seidauk hahú,” Nia informa ba jornalista sira iha nia kna’ar fatin, tersa ne’e.
Reprezentante estudante nia inan-aman, Lourenço Loe, ezije ba Diresaun Servisu Munisipál Edukasaun (DSME) Munisípiu Bobonaru aselera prosesu implementasaun, tanba estudante sira-nia direitu ba merenda eskolár lakon kuaze fulan ida ona.
Tuir nia, programa ne’e di’ak tebes tanba durante ne’e labarik sira la ezije ona inan-aman atu fó osan lori ba eskola.
“Agora, sira ba eskola la han entaun hansan inan-aman ami tenke fó osan para sira hamlaha karik sosa netik dose oan ruma para bele auguenta kabun hodi hein bainhira mak atu fila-fali ba uma. Programa ne’e la’o ona, entaun ami la presiza fó tan osan tanba sira ba eskola han hahan husi merenda eskolár, depois sira fila-fali mai uma mós bosu ona,” nia hateten.
Diretór Servisu Munisipál Edukasaun, Autoridade Munisípiu Bobonaro, Miguel Freitas, hateten Ekipa Jestasaun Programa (EJP) sira asina ona kontratu no tempu badak hahú implementa.
“Loloos ne’e hahú janeiru 2025, maibé dadus tama atraza ne’e mak to’o ágora seidauk implementa. Maibé, agora ita hein de’it nia oráriu implementasaun tanba dadus hotu-hotu ami hatama hotu ona ba munisípiu,” Antigu Diretór Ensinu Báziku Sentrál Gumer ne’e dehan
Tuir dadus ne’ebe Diresaun Servisu Munisipál Edukasaun, Munisípiu Bobonaru rekolla estudante ne’ebé atu asesu Programa Merenda Eskolár tinan 2025 hamutuk na’in-29,78 nai husi Ensinu Báziku no Pre-Eskola públiku 26,516 no Ensinu Báziku ho Pre-Eskolár Katólika 2,562.
Programa ne’e, sei implementa iha eskola Públiku hamutuk 179 ne’ebé kompostu husi Ensinu Báziku 137, hanesan Ensinu Báziku Sentrál (EBC Sigla Portugués) 23 no Ensinu Báziku Filiál (EBF) 114, enkuantu Ensinu Pre-Eskolár 32.
Entretantu, Ensinu Báziku no Ensinu Pre-Eskola Katóliku hamutuk 24, kompostu husi EBC eskola neen (6), EBF 10, Enkuantu Ensinu Pre-Eskola Katóliku ualu (8).
Totál orsamentu PME tinan 2025 ne’ebé Autoridade Munisípiu Bobonaru aloka hamutuk $1,758,783,60. Montante ne’e, fahe ba Ensinu Báziku píbliku no Katóliku hamutuk $1,564,829,28 ho totál loron efetivu 141, enkuantu Pre-Eskolár Póbliku no Katólika hamutuk $193,954.32 ba loron efetivu 174.
Notísia Relevante: PAM Bobonaro husu agrikultór hasa’e produsaun agrikola responde ba PME
Jornalista : Sérgio da Cruz
Editór : Cancio Ximenes
