BOBONARU, 17 Fevereiru 2025 (TATOLI)—Diretór Servisu Munisipál Saúde, Munisípiu Bobonaro, Gíl Bernardo Vicente, klarifika ambulánsia husi Sentru Saúde Komunitária postu Bobonaru labele ba tula pasiente Casilda dos Santos Maia, idade 61, iha suku Sibuni, ho razaun tanba difisíl tebes karreta atu ultrapasa mota Laku ne’ebé nakonu ho rai-henek no kondisaun estrada mós aat.
Diretór Gíl hatutan, konsidera imformasaun ne’ebé espalla iha mídia sosiál ne’e “hoax” ka la loos, tanba molok hulan pasiente ne’e parte Sentru Saúde Komunitária (SSK) Bobonaru ho fámilia iha ona konkordansia katak ambulánsia hein no tula de’it iha mota sorin parte aldeia Oalgomo, suku Ai-Asa nain.
Notísia Relevante: Mota Pazól-Laku difikulta abitante Molop-Sibuni asesu merkadu
“Ita-nia karreta ambulansia hein de’it iha mota sorin, labele ba liu Sibuni tanba mota, rai-henek nakonu loos depois fatuk mós barak tan, kareta labele ultrapasa. Entaun, sira konkorda malu, família sira hulan mai to’o mota sorin Oalgomo nian ne’e mak karreta ambulansia tula ba Sentru Saúde Bobonaro. Karreta ambulánsia ida hein ne’e mak tula duni,” Nia informa ba Agência Tatoli, liuhusi telefónika, segunda ne’e
Pasiente ne’e, nie esplika, mai ho kazu ‘Stroke’ ne’ebé afeta ba nia ain ho liman sorin mate, nune’e pesoál saúde SSK Bobonaro deside transporta kedas mai Hospitál Referál Maliana no iha momentu ne’e halo kedas transferénsia ba Hospitál Nasionál Guido Valladares, Bidau, Dili, tanba kondisaun grave.
“Pasiente ne’e hetan asistente iha toos, fatuk mak monu tan nia, maibé durante ne’e iha uma de’it. Entaun, família sente ladi’ak mak lori mai postu Saúde, labele entaun haruka fali mai Bobonaru,” nia dehan.
Enkuantu, daudaun ne’e pasiente Casilda dos Santos Maia, idade 61, husi suku Sibuni ne’e, daudaun ne’e hala’o hela tratamentu saude intensivu iha Hospitál Nasionál Guido Valladares (HNGV).
Notísia Relevante: Komunidade husu MOP konstrui ponte iha Molop no mota Laku
Jornalista : Sergio da Cruz
Editór : Cancio Ximenes
