KOVALIMA, 17 fevereiru 2025 (TATOLI) – Servisu Munisípiu Edukasaun Kovalima dadaun ne’e seidauk implementa Programa merenda eskolár (PME), tanba sei hein Lei Ezekusaun Orsamentu (LEO).
“Atu implementa Programa merenda eskolár, ita submete ona pedidu maibé sei hein Lei ezekusaun orsamentál (LEO),tanba husi nasionál mak prosesu seidauk to’o mai munisípiu atu jere orsamentu PME tanba falla iha finansa; ita pronto ona”, Diretora Servisu Munisípiu Edukasaun Kovalima, Elda de Fátima, relata ba jornalista sira, iha nia servisu fatin, Santa Rosa, ohin.
Dirijente ne’e esplika, la’os Kovalima de’it mak seidauk implementa Programa merenda eskolár (PME) maibé inklui munisípiu sira seluk mós seidauk implementa. Munisípiu ne’ebé mak implementa ona PME tanba iha empreza balun mak atu atende sira.
“Ha’u foin fila enkontru durante loron tolu iha nasionál. Munisípiu hotu seidauk implementa, balun implementa uluk, tanba iha empreza atu atende sira falla iha finansa sentrál la’ós iha munisípiu”, nia dehan.
Edukasaun Kovalima elobora planu feitu atu implementa PME, maibé daudaun- ne’e tama fevereiru atu ramata ona maibé seidauk implementa PME, ida-ne’e fó impaktu loron efetivu PME, tanba ne’e Edukasaun Kovalima sei esforsu fó han alunu sira iha loron sábadu.
“Ita atu labele devolve bebeik orsamentu PME tanba daudaun ne’e la implementa fulan ida liu ona, fevereiru ohin loron 17 ona. Ami sei tau planu, ami jere alunu, sábadu mós sei han, nune’e labele devolve bebeik osan implementa PME”, nia informa.
Atu implementa PME liuhusi Ekipa Jestaun Programa Servisu Munisipál Edukasaun Kovalima prontu ona no aprezenta ona ba Prezidente Autoridade Munisípiu Kovalima hein de’it ona LEO atu implementa.
Daudaun ne’e prosesu implementa PME iha Kovalima seidauk hahú, tanba sei hein LEO seidauk entaun presiza atu hein , tanba prosesu hotu Edukasaun Kovalima finaliza ona hein de’it ona atu implementa.
Orsamentu Jerál Estadu 2025 atu implementa PME iha Kovalima hamutuk $ 1,165,367,68 ho nia benefisiáriu husi eskola pre-eskolár hamutuk 1,920 ho totál orsamentu hamutuk $ 119,347.20 no benefisiáriu ba Eskola Bázika (EB) hamutuk 16,828 ho orsamentu $ 1,046.028,48.
Realizasaun PME 2025 ne’e durante loron efetivu hamutuk 148 ne’ebé implementa husi ekipa Jestaun programa 23 ne’ebé kria no kada alunu iha direitu ba han ho montante orsamentu sentavu 0,35.
Fó hanoin fali katak,OJE aloka atu implementa PME iha 2024 hamutuk milliaun $ 1 husi orsamentu ne’e, servisu edukasaun Kovalima devolve orsamentu ba kofre Estadu hamutuk $ 86,852,48. Husi orsamentu ne’e osan fíziku ka cash ne’ebé iha EJP nia liman hamutuk $ 10.613.59 no osan ne’ebé iha banku hamutuk $ 76,238.89.
Jornalista:Celestina Teles
Editór :Rafael Ximenes de A Belo
