DILI, 18 Fevereiru 2025 (TATOLI)–Jogadór timoroan ho naran istimadu Mouzinho Barreto de Lima ne’ebé antes ne’e joga iha klube Kamboja Visakha FC daudaun ne’e muda ona ba klube FK Igalo husi nasaun Montenegro.
Notísia Relevante: Mouzinho de Lima selebra kontratu ho klube Kamboja Visakha FC
“Ha’u agora hetan ona kontratu hosi klube FK Igalo husi nasaun Montenegro, klube ne’e iha segunda divizaun,” Mouzinho hateten ba Agência TATOLI liuhusi rede sosiál, tersa ne’e.
Nia dehan, tuir kontratu ne’ebé nia simu husi jerente klube ho durasaun tinan ida hahú husi Janeiru to’o Dezembru tinan 2025.
“Ha’u to’o iha ne’e fulan ida ona, ha’u sai husi Timor-Leste iha loron 11 fulan-janeiru no ha’u to’o iha ne’e iha loron 13 fulan-janeiru. Ha’u-nia kontratu ho durasaun tinan ida,” Mouzinho hateten.
Ho konfiansa ne’ebé mak klube nasaun Europa ne’e fó, Mouzinho promete sei hatudu jogu ne’ebé di’ak hodi hasa’e liutan nia kapasidade no abilidade hanesan jogadór.
Koñese klube FK Igalo
FK Igalo mak klube futeból profisionál montenegrinu ida-ne’ebé baze iha Igalo, munisípiu Herceg Novi. Klube ne’e harii iha tinan 1929 no agora daudaun kompete iha Liga daruak Montenegro nian.
Harii hanesan klube iha tinan 1929, FK Igalo mak entre klube futeból sira-ne’ebé tuan liu iha teritóriu munisípiu Herceg Novi nian. To’o dékada 70, FK Igalo joga iha Liga Dahaat ho klasifikasaun kiik-liu.
Títulu dahuluk husi kampeaun liga dahaat, Igalo manán iha époka 1975-1976. Susesu ne’e halo sira hetan promosaun dahuluk ba Liga Repúblika Montenegrina, iha ne’ebé sira pasa tempu barak liu to’o independénsia Montenegrina (2006).
Iha époka 1987-1988, FK Igalo manán segundu lugar iha Liga Repúblika, ho promosaun ba Terseira Liga Jugoslava ne’ebé foin harii.
Sira kompete de’it iha époka ida no susesu foun mosu durante époka 1995-1996. Iha tinan ne’ebá, FK Igalo manán títulu kampeaun Liga Repúblika Montenegrina nian no hetan promosaun dahuluk ba Liga Jugoslava Daruak.
Notísia Relevante: Mouzinho de Lima utiliza referénsia Cristiano Ronaldo bainhira joga
FK Igalo halo duplu iha époka ne’ebá, hodi manán Tasa Repúblika Montenegrina. Ekipa ne’e joga époka ida iha Liga Daruak 1996-1997, remata iha tabela nia okos.
Hafoin independénsia, FK Igalo joga hanesan membru ida hosi Liga Datoluk Montenegrina nian to’o époka 2010-2011. Iha tinan ne’ebá, klube ne’e manán promosaun ba Segunda Liga Montenegrina. To’o agora, FK Igalo sai hanesan membru padraun ida husi Liga Daruak, no susesu boot liu iha istória klube nian mosu iha époka 2014-2015.
Hafoin remata nu’udar ekipa terseiru lugar iha Segunda Liga, FK Igalo joga iha playoff Primeira Liga hasoru FK Mornar. Hafoin lakon 0-2 iha jogu dahuluk, FK Igalo ho surpreza manán iha jogu daruak ho rezultadu hanesan (2-0), maibé sira lakon oportunidade ba promosaun Primeira Liga hafoin penalidade.
Koñese nasaun Montenegro
Montenegro maka nasaun ida iha Sudeste Europa nian ne’ebé lokaliza iha parte oeste Balkanu nian, no jeografikamente ne’e parte norte nia halo fronteira ho Sérvia, iha parte sudeste halo fronteira ho Kosovo no Albánia.
Iha parte oeste halo fronteira ho Kroásia no Bósnia no Herzegovina, iha parte súl nia baliza ho Tasi Adriátiku. Nia iha tasi-ibun ho naruk 293,5 km tuir Tasi Asriátiku.
Istória Montenegro nian
Iha Idade Média, Montenegro halo parte iha Sérvia. Hafoin disolusaun husi Federasaun Jugoslavia iha tinan 1989, Montenegro sai parte hosi Uniaun Estadu Sérvia & Montenegro nian.
Iha loron 03 fulan-Juñu tinan 2006, Montenegro deklara independénsia ho nia kapitál mak Podgorica.
Destinu turístiku sira
Montenegro iha paizajen naturál ne’ebé furak no istória ne’ebé riku. Montenegro bele sai destinu ida-ne’ebé interesante atu esplora paizajen naturál ne’ebé furak no istória ne’ebé bele atrai turista estranjeiru no deomestikai.
Mouzinho nia esperiénsia iha futeból
Jogadór Mouzinho de Lima hahú kareira hanesan futebólista iha tinan 2010 ho idade ualu, hosi treinadór ne’ebé koñesidu ho naran Mister Kim no konsege hamutuk ho ekipa U-12, maske iha tempu ne’ebá Mouzinho labele liu iha selesaun hodi ba joga iha Koreia Súl tanba tinan seidauk too.
Maski nune’e, Mouzinho la lakon esperansa maibé nafatin iha vontade halo treinamentu iha kampu Federasaun Futeból Timor-Leste (FFTL).
Iha tinan 2012, Mouzinho kompleta ona tinan 12, ho vontade jogu ne’ebé iha fó ona konfiansa ba treinadór Kim hili nia tama iha selesaun nasionál U-12 hodi reprezenta Timor-Leste ba joga iha Korea Súl.
Arranka ba Koreia Súl, Mouzinho hamutuk ho nia amigu sira partisipa iha kompetisaun rua hanesan kopa MBC no kopa Jion-ji, maibé iha jogu rua ne’e só MBC de’it mak Mouzinho ho nia kolega sira tama to’o finál, maibé iha tiru penalidade ekipa derrota no sai segundu lugar de’it.
Iha 2013, Mouzinho nafatin hetan konfiansa husi treinadór Kim hanesan jogadór U-14 hamutuk ho nia kolega sira nafatin reprezenta Timor-Leste ba tuir kompetisaun Jion-ji too ikus sai hanesan primeiru lugar. Iha momentu ne’e, Timor-Leste konsege tama final kontra Portugál ho rezultadu eskore 1-0 hodi sai primeiru lugár.
Bainhira fila husi kopa Jion-ji iha 2013 nia klaran, Mouzinho nafatin hetan konfiansa hamutuk ho nia kolega sira fila hikas ba Korea hodi tuir festival futeból nian ne’ebé partisipa husi nasaun barak no Timor-Leste konsege sai hanesan segundu lugar tanba la konsege manán Vietname ho jogu bolu “seven site” ka joga na’in hitu-hitu.
Nune’e, iha 2014, nia dala ida tan hamutuk ho selesaun fila hikas ba Korea tuir kompetisaun Jion-ji la konsege manán tanba lakon ho Barcelona iha oitavu finál.
Ho prestasaun ne’e, iha 2015, jogadór ne’e hetan kedan konfiansa sai ba jogadór iha selesaun nasionál U-16 hamutuk ho nia amigu sira reprezenta Timor-Leste ba joga iha Brunei Darusalam iha festival Asian Football Confederation (AFC) nian ne’ebé konsege sai segundu lugár.
Iha 2016, Mouzinho nafatin hamutuk ho nia kolega sira reprezenta Timor-Leste iha festival CPLP nian ne’ebé hala’o iha Cabo-Verde, ne’ebé Timor–Leste la konsege hetan vitória iha eventu mundiál ne’e.
Maske idade seidauk to’o 19, maibé ho prestasaun ne’ebé estraordináriu ka brillante tebes, nune’e iha 2018 hetan ona konfiansa husi treinadór Kim hodi partisipa iha jogu Asian Football Association (AFF) iha Surabaya-Indonézia maibé lakon de’it iha faze grupu tanba iha jogu primeiru ho Myanmar empata, segundu ho Malázia mós empata no konsege manán Brunei, maibé jogu ikus kontra Cambodia lakon ne’ebé la konsege hakat ba semi-finál.
Bainhira fila husi AFF liu de’it loron ida kontinua kedan arranka ba São Tome e Prinsipe partisipa festival CPLP nian ho nune’e jogadór ne’e nafatin iha vontade la sente kole tanba iha nia kakutak futeból mak nia futuru.
Iha 2018, Mouzinho hetan nafatin fiar uosi treinadór Eduardo Pereira, maski sei idade 16 hamutuk ho selesaun U-21 reprezenta Timor–Leste ba joga iha kompetisaun Hasanal Bolkiah no Timor–Leste konsege hetan primeiru lugar.
Haree ba prestasaun ne’ebé di’ak tebes, iha 2019, Mozinho hetan ona konfiansa husi treinadór selesaun nasionál U-23, Norio Sukitete.
Ho konfiansa hirak ne’e, treinadór Fabio Maciel da Silva nia tempu 2021 bolu nafatin Mozinho hamutuk ho nia kolega ekipa U-23 partisipa iha jogu AFF nian iha Cambodia too ikus TimorpLeste sai terseiru lugar ba dala uluk.
Iha 2021 to’o 2022, Mouzinho nia performe di’ak tebes iha kompetisaun AFC, AFF no Sea Games Vietname halo klube Tiger laran monu hodi kontrata atu reforsa klube ne’e, nune’e iha tinan 2023 to’o 2024 Mouzinho tenke muda ba joga fali ho klube Visakha FC Kamboja nian.
Enkuantu esperénsia ho klube sira mak bainhira Liga Futeból Amadora hamrik iha 2015 no jogu la’o másimu iha 2016, jogadór Mozinho hamutuk kedan ho SLB Laulara ne’ebé Prezidente Klube mak líder nasionál Kay Rala Xanana Gusmão.
Hamutuk ho SLB, Mouzinho konsege lori sorte ba SLB tanba sai kedan primeiru lugar ba liga Timor-Leste.
Mouzinho hamutuk ho SLB hahú iha 2016 to’o 2021, nune’e iha 2021 nia klaran nia hetan kontratu hjosi Boavista Timor atu reforsa klube ne’e, maibé jogu la la’o tanba COVID-19, nune’e nia deside fila hikas ba SLB.
Biodata badak
Jogadór Mouzinho, moris iha Maliana, 26 juñu 2002. Oan hosi Mario de Lima no Adelina Barreto. Nia hanesan oan ikun husi maun-alin na’in-neen, kompostu hosi feto tolu no mane tolu.
Mouzinho hahú nia estudu Pre-Primária iha 2004 to’o 2005. Tama iha Ensinu Primaria iha tinan 2006 to’o 2011 no iha tinan 2013, tama Ensinu Pre-Sekundáriu Santa Madalena de Canossa Haslaran, Dili, iha klase primeira de’it Madre sira deside hasai nia tanba la tuir ezame.
Nune’e, jogadór ne’e deside ba kontinua fali nia Eskola iha Pre-Sekundáriu iha Cristal Dili, hafoin ramata kontinua kedan ba Eskola Ensinu Sekundáriu FINANTIL-Dili no daudaun nia eskola hela iha Universidade Nasionál Timor-Lorosa’e (UNTL).
Tama iha mudu futeból la’ós ema ida mak obriga, maibé ho vontade rasik tanba nia aman mós hanesan futebólista, maibé ladún másimu tanba dalabarak liu mete iha Boxe.
“Uma laran ha’u mesak de’it mak tama iha futeból, seluk laiha hotu. Ha’u-nia papa jogadór hotu, maibé ladún tanba nia mete barak liu iha Boxe,” nia informa.
Notísia Relevante: Klube futeból Cambodia “Angkor Tiger FC” kontrata ona jogadór Mouzinho de Lima
Jornalista : Hortencio Sanchez
Editór : Cancio Ximenes
