DILI, 07 janeiro 2022 (TATOLI) – Klube primeira divizaun hosi nasaun Kamboja atribui ona kontratu ba jogadór selesaun nasionál senior, Mouzinho Barreto de Lima, hodi reforsa klube ne’e durante liga époka rua.
“Ha’u agora iha ona Kamboja, kontratu ho Visakha ha’u konkorda no asina ona, sira fó ba ha’u kontratu tinan rua 2023-2025”, dehan Mouzinho, ba Agência TATOLI, via whatsapp.
Nia dehan sente kontente bainhira joga fali iha klube foun no promete sei hatudu performe ne’ebé brillante atu nune’e labele hamate nia kareira hanesan futebolista.
Iha 2022, avansadu selesaun nasionál ho númeru kamijola 10 selebra kontartu ho Ankor Tiger FC hanesan mós klube primeira divizaun Kamboja nian Mouzinho hamutuk ho klube ne’e durante époka ida no konklui nia kontratu iha tinan kotuk.
Durante hamutuk ho klube zigante Mouzinho konsege hatama golu haat iha jogu lubuk ida durante liga époka 2022 Kamboja nian.
Ho performe ne’ebé laiha dúvida Visakha FC laran monu kedan ba jogadór ran Timor ne’e hodi fó kontratu durante tinan-rua no sei iha posibilidade aumenta bainhira performe di’ak.
Kona-ba saláriu kada fulan nia, la fó sai tanba konfidensiál maibé ba nia ho família mak bele hatene no la presiza fó sai ba públiku.
Durante ho Angor Tiger FC jogadór ne’e utiliza númeru kamijola 77 maibé iha Visakha nia uza fali númeru 21 ho pozisaun hanesan avansadu.
Esperiésnsia Mouzinho iha mundu futeból
Mouzinho de Lima hahú kareira hanesan futebólista iha tinan 2010 ho idade ualu, hosi treinadór ne’ebé koñesidu ho naran Mister Kim no konsege hamutuk ho ekipa U-12, maske iha tempu ne’ebá Mouzinho labele liu iha selesaun hodi ba joga iha Koreia Súl tanba tinan seidauk to´o.
Maske nune’e Mouzinho la lakon esperansa maibé nafatin iha vontade tuir treinu iha kampu Federasaun Futeból Timor-Leste (FFTL).
Iha tinan 2012, Mouzinho kompleta ona tinan 12 ho vontade jogu ne’ebé iha fó ona konfiansa ba treinadór Kim, hili nia tama iha selesaun nasionál U-12 hodi reprezenta Timor-Leste ba joga iha Koreia Súl, Mouzinho hamutuk ho nia amigo sira partisipa iha kompetisaun rua hanesan kopa MBC no kopa Jion-ji, maibé iha jogu rua ne’e só MBC de’it mak Mouzinho ho nia kolega sira tama to´o finál maibé iha tiru penalidade ekipa derrota no sai segundu lugar de’it.
Iha 2013, Mouzinho nafatin hetan konfiansa hosi treinadór Kim hanesan jogadór U-14 hamutuk ho nia kolega sira nafatin reprezenta Timor-Leste ba tuir kompetisaun Jion-ji to´o ikus sai hanesan primeiru lugar.
Iha momentu ne’e, Timor-Leste konsege tama finál kontra Portugál ho rezultadu eskore 1-0 hodi sai primeiru lugar.
Bainhira fila tia hosi kopa Jion-ji iha 2013 nia klaran, Mouzinho nafatin hetan konfiansa hamutuk ho nia kolega sira fila hikas ba Koreia hodi tuir festivál futeból nian ne’ebé partisipa hosi nasaun barak no Timor-Leste konsege sai hanesan segundu lugar tanba la konsege manán Vietname ho jogu bolu “seven site” ka joga na’in hitu-hitu.
Nune’e, iha 2014, nia dala ida tan hamutuk ho selesaun fila hikas ba Koreia tuir kompetisaun Jion-ji la konsege manán tanba lakon ho Barcelona iha oitavu finál.
Ho prestasaun ne’e, iha 2015 jogadór ne’e hetan kedan konfiansa sai ba jogadór iha selesaun nasionál U-16 hamutuk ho nia amigo sira reprezenta Timor- Leste ba joga iha Brunei Darusalam iha festival Asian Football Confederation (AFC) nian ne’ebé konsege sai segundu lugar.
Iha 2016, Mouzinho nafatin hamutuk ho nia kolega sira reprezenta Timor-Leste iha festival CPLP nian ne’ebé hala’o iha Cabo-Verde, ne’ebé Timor-Leste la konsege hetan vitória iha eventu mundiál ne’e.
Maske idade seidauk to´o 19, maibé ho prestasaun ne’ebé extra-ordináriu ka brillante tebes, nune’e iha 2018 hetan ona konfiansa hosi treinadór Kim hodi partisipa iha jogu Asian Football Association (AFF) iha Surabaya-Indonézia maibé lakon de’it iha faze grupu tanba iha jogu primeiru ho Myanmar empata, segundu ho Malázia mós empata, no konsege manán Brunei, maibé jogu ikus kontra Cambodia lakon ne’ebé la konsege hakat ba semi-finál.
Bainhira fila hosi AFF liu de’it loron ida kontinua kedan arranka ba São Tome e Prinsípe partisipa festival CPLP nian ho nune’e jogadór ne’e nafatin iha vontade la sente kole tanba iha nia kakutak futeból mak nia futuru.
Iha 2018, Mouzinho hetan nafatin fiar hosi treinadór Eduardo Pereira, maske sei idade 16 hamutuk ho selesaun U-21 reprezenta Timor-Leste ba joga iha kompetisaun Hasanal Bolkiah no Timor Leste konsege hetan primeiru lugar.
Haree ba prestasaun ne’ebé di’ak tebes, iha 2019, Mozinho hetan ona konfiansa hosi treinadór selesaun nasionál U-23, Norio Sukitete.
Ho konfiansa hirak ne’e iha treinadór, Fabio Maciel da Silva nia tempu 2021 bolu nafatin Mozinho hamutuk ho nia kolega ekipa U-23 partisipa iha jogu AFF nian iha Cambodia to´o ikus Timor-Leste sai terseiru lugar ba dala uluk.
lha 2021 to´o 2022, Mouzinho nia performe di’ak tebes iha AFC, no Sea kompetisaun AFF Games Vietname halo klube Tiger laran monu hodi kontrata atu reforsa klube ne’e.
Enkuantu esperensia klube sira bainhira Futebol Amadora hamrik iha 2015 no jogu la’o másimu iha 2016, jogadór Mozinho hamutuk kedan ho SLB Laulara ne’ebé Prezidente Klube mak líder nasionál Kay Rala Xanana Gusmão. Hamutuk ho SLB Mouzinho konsege lori sorte ba SLB tanba sai kedan primeiru lugar ba liga Timor-Leste.
Mouzinho hamutuk ho SLB hahú iha 2016 to´o 2021, nune’e, iha 2021 nia klaran nia hetan kontratu hosi Boavista Timor atu reforsa klube ne’e, maibé jogu la la’o tanba Covid-19, nune’e nia deside fila hikas ba SLB.
Biografia
Jogadór Mouzinho, moris iha Maliana, 26 juñu 2002. Oan hosi Mario de Lima no Adelina Barreto.
Nia hanesan oan ikun hosi maun alin na’in-neen, kompostu hosi feto tolu no mane tolu.
Mouzinho hahú nia estudu Pre-Primária iha 2004 to´o 2005. tama iha Ensinu Primaria iha tinan 2006 to´o 2011 no iha tinan 2013, tama Ensinu Pre-Sekundáriu Santa Madalena de Canossa Haslaran Dili, iha klase primeira de’it, Madre sira deside hasai nia tanba la tuir ezame.
Nune’e, jogadór ne’e deside ba kontinua fali nia Eskola Pre-Sekundáriu iha Cristal Dili, hafoin ramatkontinua kedan ba Eskola Ensinu Ensinu Sekundáriu FINANTIL-Dili no daudaun nia eskola hela iha Universidade Nasionál Timor-Lorosa’e (UNTL).
Tama iha mudu futeból la’ós ema ida mak obriga, maibé ho vontade rasik tanba nia aman mós hanesan futebólista, maibé ladun másimu tanba dalabarak liu mete iha Boxe.
“Uma laran ha’u mesak de’it mak tama iha futeból seluk laiha hotu, ha’u nia papa jogadór bola hotu, maibé ladun tanba nia mete barak liu iha Boxe,” nia informa.
Jornalista: Hortencio Sanchez
Editór : Zezito Silva
