iklan

DESPORTU, DILI, HEADLINE

Mouzinho de Lima utiliza referénsia Cristiano Ronaldo bainhira joga

Mouzinho de Lima utiliza referénsia Cristiano Ronaldo bainhira joga

DILI, 10 marsu 2023 (TATOLI)Jogadór estrela Timor-Leste hanesan mós selesaun nasionál Mouzinho Barreto de Lima dalabarak utiliza referénsia hosi jogadór famozu Cristiano Ronaldo bainhira jogu tantu iha selesaun no iha liga.

“Ha’u foti referénsia liu ba jogadór rua ne’ebé agora daudaun naran bo’ot iha mundu hanesan Messi ho Ronaldo, maibé hau prefere liu foti referénsia barak hosi Ronaldo hodi utiliza iha jogu sira tantu selesaun no-mós liga”, Mouzinho dehn ba Agência TATOLI iha Farol Dili, ohin.

Nia dehan, jogadór estrela Portugal no Argentina ne’e sai hanesan motivadór ba jogadór hotu iha mundu maibé referénsia barak liubá nia hili mak Ronaldo tanba esforsu iha jogu laran sei fó vitória ba ekipa.

“Ha’u hili liu Ronaldo tanba nia karatér mak bainhira ita esforsu mak nia rezultadu sei la bosok ita, tanba atu hakarak hetan vitória iha jogu ruma ita tenke esforsu atu bele hetan rezultadu di’ak”, jogadór klube Visakha FC afima.

Rekorda katak Mouzinho sei joga iha klube primeira divizaun Liga Futeból Timor-Leste (LFTL) AD SLB Laulara hanesan jogadór impresta tanba iha janeiru tinan kotuk asina ona kontratu ho klube Kamboja Visakha FC.

Tanba ne’e Mouzinho sei reforsa SLB durante fulan rua no iha maiu sei fila hikas ba Kamboja hodi joga hamutuk klube ne’ebé fó ona kontratu ba nia durante époka ida.

Aleinde ne’e Mouzinho mós agora hala’o hela treinamentu ho selesaun nasionál hodi prepara ba jogu SEA Games tinan ne’e.

“Agora daudaun ha’u mós treinu hela iha selesaun nasionál prepara ba SEA Games agora, iha jogu ne’e sei esforsu atu bele hatudu rezultadu di’ak”, nia relata.

Mouzinho hanesan oan mane ikun hosi maun alin na’in neen kompostu hosi feto tolu no mane tolu oan hosi Mario de Lima Guterres no Adelina Barreto Moniz. Mouzinho moris iha Maliana 26 juñu 2002.

Tama iha mudu futeból la’os ema ida mak obriga nia maibé ho vontade rasik tanba nia papa mós hanesan futebolista maibé ladún másimu tanba dalabarak liu mete iha Boxe.

Mouzinho hahú nia estudu hanesan pre-primaria iha 2004-2005, tama iha primaria 2006-2011, ensinu pre-sekundáriu klase ida no rua de’it Madre sira deside hasai nia tanba la tuir ezame iha Santa Madalena de Canossa Haslaran Dili 2013, nia ba kontinua fali nia eskola pre-sekundáriu iha Cristal Dili iha 2014 no remata kontinua kedan sekundáriu iha 2015-2017 iha eskola FINANTIL Dili no agora daudaun nia kontinua eskola Universidade N asional Timor Lorosase (UNTL).

Esperiénsia Mouzinho iha futeból

Mouzinho de Lima hahú kareira hanesan futebólista iha tian 2010 ho idade 8 hosi treinadór ne’ebé koinesidu ho naran Mister Kim, tama ona ba U-12 maski idade sei kiik, ho nune’e iha tempu ne’ebá Mouzinho labele liu iha selesaun hodi ba joga iha Korea Súl tanba tinan seidauk to’o.

Maske nune’e Mouzinho la lakon esperansa nafatin iha vontade ba halo treinamentu iha kampo Federasaun Futeból Timor – Leste (FFTL).

Nune’e iha tinan 2012 Mouzinho kompleta ona idade 12, ho vontade jogu ne’ebé iha fó ona konfiansa ba treinadór Kim hili nia tama iha selesaun nasionál U-12 hodi reprezenta Timor – Leste ba joga iha Korea.

Aranka ba Korea Mouzinho hamutuk ho nia amigo sira partisipa iha kompetisaun rua kopa MBC no kopa Jion-ji maibé iha jogu rua ne’e só MBC de’it mak Mouzinho ho nia kolega sira tama too finál iha ne’ebé hasoru Korea lakon iha tiru penalidade ho nune’e Timor – Leste hetan segundu lugar.

Iha 2013 Mouzinho nafatin hetan konfiansa hosi treinadór Kim hanesan joagdór U-14 hamutuk ho nia kolega sira nafatin reprejenta Timor – Leste ba tuir kompetisaun Jion-ji too ikus sai hanesan primeiru lugar/ iha ne’ebé Timor – Leste final ho Portugal no Portugal reprezenta hosi Lisbom too Timor – Leste manán mihis 1-0 sai primeiru lugar.

Bainhira fila tia hosi kopa Jion-ji iha 2013 nia klaran/ Mouzinho nafatin hetan konfiansa hamutuk ho nia kolega sira fila hikas ba Korea hodi tuir festival futeból nian ne’ebé partisipa hodsi nasaun barak no Timor – Leste konsege sai hanesan segundu lugar tanba la konsege manán Vietname ho jogu bolu seven site ka joga na’in hitu-hitu.

Nune’e iha 2014 Mozin ho dala ida tan hamutuk ho selesaun fila hikas ba Korea tuir kompetisaun Jion-ji la konsege manán tanba lakon ho Barcelona iha oitavu final.

Iha 2015 Mouzinho hetan kedan konfiansa sai ba jogadór U-16 hamutuk ho nia amigo sira reprezenta Timor – Leste ba joga iha Brunei Daru Salam iha festival Asian Football Confederation (AFC) nian Timor – Leste konsege sai segundu lugar.

Iha 2016 Mouzinho nafatin hamutuk ho nia kolega sira reprezenta nafatin Timor – Leste iha festival CPLP nian ne’ebé halao iha Caboverde no Timor – Leste la konsege manán iha jogu hirak ne’e.

Maski idade sei dauk too 19 maibé ho prestasaun ne’ebé extraordinariu ka brillante tebes iha 2018 hetan ona konfiansa hosi treinadór Kim hodi partisipa iha jogu Asean Football Asosiation (AFF) iha Surabaya Indonezia maibé lakon de’ikt iha faze grupu tanba iha jogu primeiru ho Myanmar empata, segundu ho Malazia empata/ manán Brunei no ikus kontra Cambodia lakon la konsege hakat ba semi-final.

Bainhira fila hosi AFF liu de’it loron ida kontinua kedan aranka ba São Tome e Prinsipe partisipa festival CPLP nian ho nune’e jogadór ne’e nafatin iha vontade la sente kole tanba iha nia kakutak futeból mak nia futuru.

Hare ba prestasaun ne’ebé di’ak tebes Mouzinho hetan ona konfiansa hosi treinadór selesaun nasionál U-23 Norio Sukitete hodi treinu hamutuk.

Iha 2018 Mouzinho hetan nafatin fiar hosi treinadór Eduardo Pereira maski sei idade 16 hamutuk ho selesaun U-21 reprezenta Timor – Leste ba joga iha kompetisaun Hasanal Bolkiah no Timor – Leste konsege hetan primeiru lugar.

Ho nune’e iha 2019 prestasaun ne’ebé Mouzinho iha la monu fó nafatin konfiansa ba treinadór sira lori nia ba hamutuk ho selesaun nasional senior too agora.

Ho konfiansa hirak ne’e iha treinadór Fabio Maciel da Silva nia tempu 2021 bolu nafatin Mouzinho hamutuk ho nia kolega U-23 partisipa iha jogu AFF nian iha Cambodia too ikus Timor – Leste sai terseiru lugar bad ala uluk.

Iha 2021 too 2022 Mouzinho nia performe di’ak tebes iha kompetisaun AFC/ AFF no Sea Games Vietname halo klube Tiger laran monu kedan ba nia too ikus nia ba reforsa kedan klube ne’e.

Esperiénsia Mouzinho iha klube Timor – Leste

Bainhira Liga Futeból Amadora hamrik iha 2015 no jogu lao masimu iha 2016 Mouzinho hamutuk kedan ho SLB Laulara ne’ebé prezidente mak Kay Rala Xanana Gusmão.

Bainhira hamutuk ho SLB Mouzinho konsege lori sorte ba SLB tanba sai kedan primeiru lugar ba liga Timor – Leste nian maski sei amadora.

Mouzinho hamutuk ho SLB hahú iha 2016-2021, iha 2021 nia klaran nia hetan kontaktu hosi Boavista Timor atu joga hamutuk kontratu asina hotu ona maibé jogu la lao tanba Covid-19 para too agora no nia deside fila hikas ba SLB.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!