BOBONARU, 19 Fevereiru 2025 (TATOLI)—Povu Japaun liuhusi Organizasaun Naun Governamentál (ONG) Frontline, kuarta ne’e, apoia Solár Panél ho kapasidade 3 KW no bateria 10KW ba Sentru Saúde Komunitária (SSK) Kakanea, suku Lourba, postu administrativu Bobonaru, Munisípiu Bobonaru hodi asegura kualidade kuidadu saúde materna ho infantíl no asegura mákina Ekografia (USG).
Notísia Relevante: ONG Frontline apoia programa saúde materna infantil iha Bobonaro
Apoia ne’e oferese liuhusi programa ‘Hasa’e kualidade servisu Saúde inan, neonatál no infantíl liuhusi treinamentu ba pesoál saúde iha munisípiu Bobonaru’, ho objetivu atu prevene kazu mortalidade no morbilidade inan ho oan iha munisípiu Bobonaro.
ONG Frontline hili Munisípiu Bobonaru sai área projetu tanba iha tempu udan dalaruma eletrisidade sempre mate to’o semana ida, nune’e la seguru ba inan isin-rua sira atu ba konsulta iha fasilidade saúde no difisíl tebes atu partu.
“Objetivu husi atividade ne’e atu fó konsultasaun di’ak ba komunidade iha munisípiu Bobonaru. Ami hein katak komunidade bele konsulta di’ak, bele deteta problema lalais, atu bele hadi’a sira-nia saúde liuhusi ita-nia atividade. Tanba, iha Japaun, feto barak bele simu ezame ekografia durante sira isin-rua maibé iha Timor-Leste feto barak susar tebes liuliu iha área rural. Agora, iha munisípiu Bobonaru, kazu partu mate sei iha maibé se inan sira bele simu Ekografia antes sira partu bele hetan dalan partu. Ho ida-ne’e, ita bele hamenus kazu partu ho bebé mate,” Country Director Frontline, Yohei Kawaguchi, hateten iha Sentru Saúde Kakanea
Nia konfirma, povu Japaun mós sei kontinua apoia povu munisípiu Bobonaru liuhusi konstrui sala maternidade iha fasilidade saúde.
“Ami apoia hodi hadi’ak kualidade saúde iha munisípiu Bobonaru no ami fiar katak ami-nia projetu ne’e bele ajuda pesoál saúde sira-nia servisu no sira-nia ajuda ba komunidade atu sai boot-liu duké agora,” nia dehan.
Biban ne’e, Sekretáriu Autoridade Munisípiu Bobonaru ba asuntu Sosiál, Julio Carvalho Coerro, hato’o agradesimentu ba povu Japaun ne’ebé ho laran luak apoia povu Timor-Leste espesiálmente iha munisípiu Bobonaru.
Julio Caerro konsidera fasilidade ne’e bele fasilita ona pesoál saúde sira halo atendimentu ba komunidade iha tempu kalan bainhira eletrisidade mate.
“Ita-nia inan isin-rua iha munisípiu Bobonaru n’e risku boot, dalaruma ahí mate entaun ida-ne’e labele atende lalais. Ha’u husu ba pesoál saúde sira tenke iha responsablidade morál atu kuida ekipamentu ne’ebé sira fó, labele ohin mai monta tiha batería semana oin aat fali ona, tanba ita presiza mak ema fó,” nia hateten.
Diretór Servisu Saúde Munisípiu Bobonaru, Gíl Berrnado Vicente, sente orgullu tanba prezensa parseiru Frontline tinan ida ona, aleinde instala Solár Panél, kapasita mós pesoál saúde sira liuhusi formasaun Ekografia, atividade kompañia pakote Integradu Saúde no seluk tan.
“Ita-nia parseiru Frontline liuhusi povu Japaun ajuta ita, ita orgullu boot tebes ba ita-nia parseiru. Espera katak, ita-nia servisu hamutuk ne’e bele la’o ho di’ak nafatin. Husu ba kolega sira atu bele apoia nafatin,” nia dehan.
Enkuantu, fasilidade Solár Panél ne’e mós instala ona iha Sentru Saúde Komunitária Postu Administrativu Bobonaru.
Frontline mak Organizasaun Naun Governamentál ida-ne’ebé hetan apoia fundu husi Governu Japaun ne’ebé servisu hodi hadi’a saúde komunitária iha Timor-Leste.
Projetu refere faze dahuluk implementa iha munisípiu Bobonaru durante tinan ida no sei kontinua extende tán.
Notísia Relevante: Japaun no ONG Frontline selebra kontratu hadia saúde reprodutiva maternál iha Ermera
Jornalista : Sérgio da Crúz
Editór : Cancio Ximenes
