BOBONARO, 19 fevereiru 2024 (TATOLI) – Organizasaun Naun Governamentál Frontline, segunda ne’e aprezenta projetu foun Improving The Quality Of Maternal Health Services Through Capicity Bulding For Doctor And Mindwives iha Bobonaro bá Diresaun Servisu Munisipál Saúde Bobonaro no xefe sentru saúde komunitária hitu.
Projetu foun ne’e ho objetivu hasa’e kualidade servisu saúde maternal liuhosi hasa’e kapasitasaun ba médiku no parteira sira.
Country Diretór Frontline iha Timor-Leste, Yohei Kawaguchi, hateten projetu ne’e sei implemeneta iha sentru saúde Kakanea, suku Lourba, postu administrativu Bobonaro, iha fulan-abríl tinan 2024 ho intensaun atu fó apoia no haforsa programa saúde maternu infantil.
Parseiru internasionál ne’e hala’o servisu ne’e hodi hasa’e reprodutivu, maternál no infantil liuhosi fasilita treinamentu ba pesoál saúde sira iha postu no sentru saúde komunitária sira hodi hadi’a kualidade, kapasidade ba atendimentu, utilizasaun mákina ultrasound, klase ba inan isin-rua no programa oinoin.
Programa ne’e realiza ho objetivu atu prevene mortalidade no morbilidade inan no oan iha munisípiu Bobonaro.
Notísia relevante: Diretór Saúde Bobonaro la tolera pesoál saúde abandona serbisu
“Ami hanoin projetu sira hanesan ne’e importante, tanba Timor-Leste nia kualidade saúde maternidade no kosok-oan sira sei ladún aas, entaun dalaruma mate, ida-ne’e ladi’ak ba futuru komunidade sira-nia, entaun ami hakarak halo projetu hadi’a saúde inan isin-rua, maternidade no bebé foin moris,” nia hateten iha intervensaun ba atividade ne’ebé realiza iha salaun enkontru, servisu saúde munisípiu Bobonaro.
Yohei Kawaguchi, subliña frontline hakarak hili munisípiu Bobonaro sai área projetu tanba munisípiu ne’e tanba iha tempu udan dalaruma eletrisidade sempre mate bele to’o semana ida, entaun ladún seguru ba inan isin-rua sira atu mai konsulta iha fasilidade saúde sira no difisil tebes atu fo partu.
Alende ne’e sentru saúde komunitária tolu iha munisípiu Bobonaro laiha sala atendimentu maternidade.
“Númeru mortalidade liuliu inan isin rua no bebé foin moris iha Bobonaro sei aas. Ida-ne’e mak ami hanoin problema boot, no tinan oin ami hakarak halo planu konstrusaun ba maternidade, tanba ami haree iha Bobonaro organizasaun apoiu área saúde oituan deit, entaun ami Frontline mak tama atu fó apoia saúde ba inan isin-rua no bebé foin moris,” nia katak.
Xefe Departamentu Maternu Infantil hosi Ministériu Saúde, Augusta Amaral Lopes, konkorda tebes parseiru Fronteline atu implementa projetu ne’e, tanba durante ne’e observa projetu refere hala’o iha Guisarudo, Ermera hatudu progresu di’ak tebes.
“Ha’u husu ba pesóal saúde no jestór sira, atu aproveita saida mak sira lori mai iha-ne’e, tanba ita sei iha problema barak, intermu implementasaun programa maternu saúde infantil, ne’ebé sira sei apoia treinamentu ba ekografia, depois sei fahe tán ekipamentu, atu ita labele halo tranferénsia bebeik mai Maliana,” nia dehan.
Diretór Servisu Munisípiu Bobonaro, Gil Bernardo Vicente, agradese ba parseiru Frontline ne’ebé iha inisativa di’ak hakarak apoia no dezenvolve setór saúde iha munisípiu Bobonaro liuliu programa saúde bá inan ho oan.
“Ami hato’o Benvindu tanba ita-boot sira mai ona atu bele servisu hamutuk ho ami hodi bele ajuda no haree programa sira-ne’ebé importante, liga ba saúde inan ho oan ne’ebé durante ne’e ita enfrenta problema, tanba ne’e husu ba ita hotu atubele koopera ho ita-nia parseiru atu nune’e programa no planu sira-ne’ebé iha bele realiza ho susesu,” nia katak.
Enkuantu Frontline mak Organizasaun Naun Governamentál ida ne’ebé hetan apoia fundu hosi Governu Japaun ne’ebé servisu hodi hadi’a saúde komunitária iha Timor-Leste, projetu refere sei implementa durante tinan ida no sei kontinua extende tán.
Notísia relevante: Ministériu Saúde reativa grupu suporta inan iha Bobonaro
Jornalista: Sérgio da Cruz
Editór: Evaristo Soares Martins
