iklan

BOBONARO, HEADLINE, MUNISÍPIU, SAÚDE

Ministériu Saúde reativa grupu suporta inan iha Bobonaro

Ministériu Saúde reativa grupu suporta inan iha Bobonaro

Ministériu Saúde liuhosi servisu saúde munisipál, hamutuk ho parseiru dezenvolvimentu sira, fó advokasia ba xefe sentru saúde postu administrativu no reponsável programa saúde sira hodi reativa programa suporta inan iha munisípiu Bobonaro. Imajen Tatoli/Sérgio da Cruz.

BOBONARO, 12 setembru 2022 (TATOLI)-Ministériu Saúde (MS) liuhosi Servisu Saúde Munisipál, serbisu hamutuk ho parseiru dezenvolvimentu sira, segunda ne’e hala’o advokasia ba xefe sentru saúde no responsável programa saúde hodi reativa hikas programa suporta inan iha munisípiu Bobonaro.

Xefe departamentu saúde ambientál hosi Ministériu Saúde, Agustinho de Oliveira, hateten,  programa ne’e sei integra mós  programa sira seluk hanesan,saúde maternu infantíl, saúde ambientál ne’ebé liga liu suku ne’ebé deklara ona Área la Soe Foer Arbiru (ALFA) inklui bee no saneamentu atu nune’e bele asegura ambiente atu komunidade sira labele afeta ba moras pandemia Covid-19 no moras seluk hodi mellora atendimentu saúde iha nível suku to’o aldeia.

Alende ne’e sei implementa mós programa nutrisaun atu hadi’ak saúde inan isin-rua no labarik nian hodi responde ba problema má-nutrisaun iha munisípiu Bobonaro no territóriu laran tomak.

Notísia relevante: Saúde Bobonaro husu komunidade ‘hadook-aan’ konsumu ai-han kontaminadu kímiku

“Grupu suporta inan ita implementa ona tinan barak, agora ita reativa fali tanba ita haree ba programa sira-ne’ebé mak atu suporta, entaun ohin ita halo advokasia ba sentru saúde sira, atu bele habelar programa ne’e iha baze, hodi tulun inan isin-rua no labarik sira-ne’ebé má-nutrisaun,” nia hateten iha salaun servisu saúde munisípiu Bobonaro.

Responsável Programátiku Servisu Saúde Munisípiu Bobonaro, Paulina de Assunção Deneire, reforsa programa ne’e atubele apoia pesoál saúde sira iha atividade SISCA, mobile klínika hodi bele identifika grupu alvu sira ba iha kazu má-nutrisaun.

Grupu suporta inan kada aldeia no suku ida reprezenta ema na’in-15 atu sai Promotór Saúde  Familiár (PSF) atu ajuda komunidade sira liuhosi atividade distribuisaun vitamina (A) no albendaznól ba labarik kiik sira nune’e bele aumenta imunidade kontra moras.

“Ohin, ita halo advokasia nível munisípiu,reativa kedas programa suporta inan, komesa aban sei implementa kobre hotu postu administrativu sira no atividade ne’e sei implementa iha suku 50

Paulina akresenta, iha fulan-outubru sei implementa atividade kampaña  hodi introdús vasina Foun PSV no kontinua hala’o atividade Meseles Rubela (MR) ba labarik sira no grupu idade fulan-sia to’o tinan-lima.

“Ha’u hakarak fó mensajen ba komunidade sira, liuliu ita-nia grupu alvu inan-isin rua,inan fó susu no labarik tinan lima mai kraik, ita estabelese ona programa ne’e, bainhira grupu suporta inan fahe informasaun ba ita-boot sira tenke partisipa, tanba saúde iha ita-nia liman rasik,” nia apela.

Sekretáriu Autoridade Munisípiu Bobonaro, João Fátima do Carmo, sente kontente no agradese ba Ministériu Saúde no parseiru dezenvolvimentu sira-ne’ebé iha inisiativa reativa programa ne’e hodi tulun hadi’ak komunidade sira-nia saúde.

Autoridade munisípiu ne’e konsidera liuhosi programa ne’e mós bele motiva inan isin-rua sira hakbesik ba sentru saúde sira hodi bele asesu subsídiu ba programa Bolsa da Mãe Jerasaun Foun ne’ebé implementa hosi Ministériu Solidariedade Sosiál no Inkluzaun (MSSI).

“Ami hanesan autoridade munisípiu liuhosi lideransa komunitária sira nafatin apoia programa ne’e ho grupu suporta inan sira iha baze atu tulun ita-nia komunidade sira hodi bele asesu ba programa saúde nia,” nia katak.

Reprezentante komandante PNTL munisípiu Bobonaro, Inspetór Fátima Motu Mali, promete sei orienta membru Ofisiál Polísia Suku (OPS) fó seguransa ba programa ne’e to’o remata.

“Ita-boot sira halo karta mai komandu depois kuandu tún ba postu administrativu ne’ebé liga ba komandante eskuadra sira, depois komandante sira mak haruka nia membru sira hodi suporta parte saúde,” nia dehan.

Enkuantu programa ne’e hetan apoia hosi ajénsia Word Vision no parseiru dezenvolvimentu UNICEF no Worlds Food Programa (WFP) fó apoia liuhosi Ministériu Saúde ho totál orsamentu por volta rihun $12-resin ba munisípiu Bobonaro.

Notísia relevante: Austrália apoiu $800.000 ba MS halo peskiza ba moras tuberkoluze iha TL

Jornálista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!