KOVALIMA , 21 fevereiru 2025 (TATOLI)- Prezidente Autoridade Munisípiu Kovalima Miguel Armada Cardoso, sei koordena ho nasaun viziñu Indonézia bainhira atu reativa merkadu iha fronteira Mota Masin Tilomar, Kovalima.
“Ho vizita Ministru MCI (Nino Pereira), autoridade sei kria reuniaun ida, oinsá koordena ho nasaun viziñu Indonézia hodi haree no hato’o informasaun ba ministru atu reativa merkadu iha fronteira nune’e komunidade sira bele fa’an produtu lokál”, Miguel Armada Cardoso hato’o ba jornalista sira hafoin akompaña Ministru MCI observa Merkadu Camenasa, ohin.
Notísia relevante:MCI observa direta kondisaun merkadu fronteira Mota Masin
Autoridade mós dehan, merkadu iha fronteira Mota masin estabelese hosi administradór sesante sira maibé seidauk halo jestaun ho di’ak.
Ho nune’e bainhira atu reabilita fali merkadu iha fronteira Mota Masin presiza identifika mós produtu lokál saida mak bele komersializa iha estabelesimentu komersiál fronteira ba nasaun viziñu Indonézia.
“Atu fa’an produtu iha merkadu fronteira Mota Masin, ita mós sei identifika produtu lokál saida de’it mak iha valór ekonómiku hodi fa’an iha merkadu fronteira nune’e nasaun viziñu Indonézia bele sosa”, nia informa.
Produtu ne’ebé mak bele fa’an mak hanesan pateka, vestuáriu uzadu ka OB no seluktan ne’ebé mak nasaun viziñu Indonézia sira la iha nune’e sira bele sosa.
Reativa merkadu fronteira aleinde promove produtu lokál bele limita mós sidadaun sira hala’o atividade negósiu ho dalan ilegál.
Merkadu iha fronteira Mota Masin daudaun ne’e la uza tanba ne’e sidadaun balun mak uza hodi sai hanesan sira-nia hela fatin.
Notísia relevante:Vizita MCI ba funsionáriu destakadu iha Mota Masin: “Ita apresia”
Jornalista:Celestina Teles
Editór :Rafael Ximenes de A. Belo
