KOVALIMA, 20 fevereiru 2025 (TATOLI) –Ministru Komérsiu no Indústria (MCI), Filipos Nino Perreira, hamutuk ho nia ekipa hala’o vizita direta ba funsionáriu komérsiu ne’ebé destaka iha Fronteira Mota Masin, Tilomar, Kovalima, hodi haree kondisaun servisu.
Iha ámbitu vizita ne’e, Ministru apresia servisu funsionáriu komérsiu ne’ebé durante ne’e hamutuk ho liña ministeriál sira hodi halo koordenasaun no halo komunikasaun kona-ba servisu, haree ba asuntu ekonomia iha fronteira Mota Masin.
“Ita apresia servisu funsionáriu no koordenasaun no komunikasaun di’ak husi parte komérsiu hamutuk liña ministeriál ne’ebé destaka iha postu integradu Mota Masin, oinsá ita bele salva interrese soberanu Timor-Leste liga ba asuntu ekonomia”, Governante MKI, Filipos Nino Perreira dehan ba jornalista sira, iha Mota Masin, ohin.
Pontu entrega fronteira Mota Masin hanesan odamatan ne’ebé atu halo movimentu ekonomia halo importasaun no esportasaun sasan merkadória no sidadaun sira tama sai entaun presiza kondisiona fatin nune’e iha produtividade ekonomia.
“Mai iha fatin ida-ne’e atu enkoraja servisu funsionáriu hodi haree no rona direta sira difikuldade oinsá mak ita bele fasilita servisu sira ne’e hodi halo atendementu ne’ebé di’ak liu oinsá servisu la’o tuir regra”, nia fó hanoin.
Governante ne’e haktuir, informasaun ne’ebé nia simu katak katak atividade esportasaun la’o hela no produtu agríkola hanesan maek, kamí kulit no isin no produtu sira seluk ne’ebé mak durante ne’e tama sai iha fronteira Masin hetan kontrolu husi komérsiu no Alfándega no entidade seluk iha fronteira Mota masin.
Fó hanoin fali katak molok ne’e Diretór Alfandega Fronteira Mota Masin Nuno Nogueira fó sai katak durante ne’e empreza Madarlin de’it mak Esporta produtu sira hanesan kamí ne’ebé faan iha Nasaun viziñu Indonézia.
Jornalista:Celestina Teles
Editór :Rafael Ximenes de A. Belo
