DILI, 21 Fevereiru 2025 (TATOLI) – Embaixadór Kamboja Naun Rezidente, Tean Samnang, hasoru malu ho Primeiru-Ministru, Xanana Gusmão, hodi diskute kona-ba amizade entre país rua ne’e.
Embaixadór Tean Samnang relata katak enkontru ne’e sai momentu priviléjiu ida ba nia hodi hasoru malu ho xefe Governu.
“Ami-nia diskusaun furak tebes hodi ko’alia kona-ba relasaun amizade no kooperasaun entre nasaun Timor-Leste [TL] no Kamboja, nomós foku ba setór edukasaun no komérsiu”, diplomata ne’e hateten iha Palásiu Governu, ohin.
Nia haktuir katak iha reuniaun ne’e Timor- Leste mós husu Kamboja nia esperiénsia kona-ba rekonsiliasaun no dame nian. “Ami-nia esperansa katak iha futuru bele kontinua apoia malu iha parte rejiaun, nomós iha mundu”, dehan.
Embaixadór ne’e mós relata katak iha setór komérsiu nian, iha tinan kotuk, importa ona foos tonelada rihun 4 mai Timor-Leste.
Notísia relevante: Governu sosa tan foos tonelada 4.000 hosi Kambódia
“Ida-ne’e ami-nia esportasaun daruak ne’ebé ami halo no iha parte edukasaun nian ami mós apoiu fó bolsa estudu ba estudante timoroan na’in-10 [iha 2024] bá eskola iha universidade Kamboja no sei ramata iha 2028. Estudante 20 husi Timor-Leste mak simu ona bolsa husi universidade Kamboja”, nia adianta.
Notísia relevante : https://tatoli.tl/2024/04/26/timoroan-nain-10-hetan-bolsa-estudu-eskola-iha-cambodia/
Jornalista: Arminda Fonseca
Editora: Maria Auxiliadora
