DILI, 13 dezembru 2023 (TATOLI)—Governu liuhosi Sentru Lojístiku Nasional (CLN, sigla portugés) daudaun ne’e sosa tan foos importasaun tonelada 4.000 hosi nasaun Kambódia.
“Stock prudutu ne’ebé daudaun iha mak foos rai hamutuk tonelada 1.385, hare kulit tonelada 1.586, foremungu tonelada 295, koto tonelada 180 no ita sosa tan foos importasaun tonelada 4.000, ne’ebé hamutuk tonelada 6.178,” Diretór Transporte no Lojístiku CLN, Tito da Costa, informa ba Agência Tatoli, via telefónika, kuarta ne’e.
Notísai relevante : Governu sei halo intervensaun foos importasaun iha semana oin
Nia dehan, emprez internasionál mak sai manán-na’in iha konkursu públiku ba importasaun foos no daudaun ne’e karega ona iha Vietname, janeiru 2024 sei to’o Timor-Leste.
“Foos ne’ebé ita sosa ne’e ho orsamentu hamutuk millaun $3, ne’ebé bainhira foos ne’e to’o, totál iha armazen hamutuk tonelada 6.000, bele responde ona situasaun rai-laran,” nia akresenta.
Jornalista : Arminda Fonseca
Editora : Julia Chatarina
