Governu lansa balkaun úniku iha Likisa
DILI, 21 Fevereiru, 2025 (TATOLI)—Governu liuhusi Ministeriu Administrasaun Estatál (MAE), Tomás do Rosário Cabral, sesta ne’e, halo lansamentu ba balkaun úniku iha Munisípiu Likisa.
Notísia Relevante: Governu hahú regula funsionamentu Balkaun Úniku
“Objetivu husi Balkaun Úniku hanesan inovasaun ida iha fornesimentu informasaun no atendementu públiku ba sidadaun no setór privadu. Ida-ne’e mak modelu servisu foun ida-ne’ebé oferese atensaun personalizadu iha espasu fíziku ida de’it iha nivel lokál,” refere nota ne’ebé Agência TATOLI asesu husi média portál Munisípiu Likisa, ohin.
Balkaun úniku ne’e, atu promove mós kultura inovadora ida iha prestasaun servisu sira husi Administrasaun Públika, Balkaun Úniku hakarak hamenus burokrasia no korrupsaun, simplifika prosedimentu sira, aselera no moderniza prestasaun servisu públiku sira.
Iha ninia versaun dijitál, Balkaun Úniku hakarak sai fonte ida-ne’ebé konfiável no seguru ba asesu ba informasaun kona-ba prosedimentu sira atu asesu ba servisu públiku sira, konstitui instrumentu importante ida ba transparénsia ativa.
Vízaun ho Misaun balkaun uniku, Atu sai referénsia nasional ida iha fornesimentu informasaun no servisu públiku sira, hodi promove melloramentu kontinua iha kualidade no modernizasaun Administrasaun Públika nian.
Demokratiza asesu ba informasun no servisu públiku sira iha populasaun nia leet, liuhusi unidade servisu prezensiál no online, ho foku ba transparénsia, efisiénsia no kualidade.
Asegura sustentabilidade modelu servisu foun ida-ne’e iha nasaun laran, atu nune’e bele habelar kanál komunikasaun entre Administrasaun Públika no populasaun.
Partisipa iha atividade ne’e, Presidente Autoridade Munisipiu Liquiçá, Paulino Ribeiro, Ministru Justisa (MJ) Sérgio de Jesus Fernandes da Costa Hornai, Reprezentante UNDP iha Timor-Leste Katyna Argueta, Xefe Suku sira iha Munisípiu Likisa no funsionáriu hotu ne’ebé servisu iha Administrasaun Munisípiu.
Notísia Relevante: PM Xanana lansa edifisiu no portal Balkaun Úniku iha Manatuto
Jornalista : Hortencio Sanchez
Editór : Cancio Ximenes
