DILI, 24 Fevereiru 2025 (TATOLI)-Vise Ministru ba asuntu Parlamentár, Adérito Hugo da Costa, hateten Governu kontinua reorganiza kapitál Dili hodi prevene inundasaun iha tempu udan ho intensidade maka’as.
“Deklarasaun polítika kona-ba efeitu husi jestaun ba trata sidade Dili liga ho eviksaun ninia impaktu, públiku tenke hatene ida ne’e husi jestaun IX Governu nian ba halo reorganiza sidade Dili, ninia faktu iha inundasaun udan ho intensidade boot iha sábadu liu-bá hatudu katak, jestaun ba reoganiza kapitál tenke kontinua nafatin”, Reprezentante Governu ne’e responde deklarasaun polítika Bankada opozisaun Fretilin iha reuniaun plenária Parlamentu Nasionál (PN), segunda ne’e.
Nia hateten despeju administrativu ne’ebé halo ona seidauk sufisiente, limpeza iha kanál antigu sira la sufisiente atu regulariza bee bainhira udan ho intensidade boot hanesan iha sábadu liu-bá. Entaun ho faktu ne’e IX Governu agora kontinua ho udan intensidade boot sábadu liu-bá ne’e ajuda Governu atu kontinua halo jestaun ba reorganiza kapitál Dili, ba prevensaun futuru inundasaun ne’ebé iha.
“Maibé, faktu pozetivu ida mós aleinde akontese sábadu ne’e fó ba Governu mateira sufisiente hodi deteta fatin ne’ebé risku nafatin ba inundasaun. Ba kanál ida ne’ebé seidauk másimu halo manutensaun hodi bele hamenus bee sa’e ba Estrada”, nia akresenta.
Vise Ministru, hateten agora Governu identifika hetan ona ninia solusaun no solusaun mak sei kontinua halo despeju administrativu ba populasaun ne’ebé halo uma la konsidera kanál bee ne’ebé iha.
“Hanesan saida mak akontese iha Bairru Pite ho Hudi-Laran iha sábadu, deteta ona problema ne’e, espasu bee halai nian uma mak metin hotu husik kanál ne’e kiik-oan tiha, agora Governu deteta solusaun tenke haluan kanal no atu haluan kanal mak eviksaun”, nia tenik.
Nia esplika despeju administrativu kaer ba rejime kompesasaun ne’ebé tuir lei iha, ba populasaun ne’ebé hetan eviksaun ne’e. Despeju administrativu halo kompensasaun justu tuir lei ba povu sira ne’ebé afetadu tanba rai ne’e sira-nia trata oinseluk tuir lei no afetadu tanba okupasaun rai la’ós ninia ne’e valór rai kompensasaun la hanesan.
Notísia relevante: SEATOU komprometidu hadi’a no organiza sidade tuir orden
Deputada CNRT, Cedelízia Farria dos Santos, apresia serbisu IX Governu durante ne’e liuhusi Sekretária Asuntu Toponímia no Urganizasaun Urbana (SEATOU) organiza kapitál, tanba ita haree udan intensidade boot iha sábadu liu-bá ita la haree inundasaun boot iha fati-fatin.
Deputadu FRETILIN, Antoninho Bianco, kontinua preokupa ho despeju administrativu ne’ebé SEATOU hala’o la kria kondisaun uluk ba povu molok hasai.
Notísia relevante: MOP indemniza uma-kain besik 200 iha fulan ne’e
Jornalista : Nelson de Sousa
Editora : Rita Almeida
