VIETNAME, 24 Fevereiru 2025 (TATOLI)—Prezidente Repúblika (PR), José Ramos Horta, ho nia delegasaun to’o ona iha aeroportu Internasionál Hanoi tuku 16h50 lorokraik oras Vietname ho aviaun Vietjet Air númeru 998.
Notísia Relevante: PR Horta ohin dezloka ba Vietname partisipa Fórum Futuru ASEAN 2025
Prezidente Repúblika ho nia delegasaun hafoin viajen husi Dili ba Denpasar Bali-Indonezía durante minutu 55 ho aviaun Aero Dili númeru Voo 8G 181 no Bali ba Vietname durante oras haat resin ne’e, simu direta husi Embaixadór Timor-Leste iha Vietname, João Pereira no Vise Ministru Negósiu Estranjeiru Vietname, Ngo Le Van no seluk tan.
Objetivu husi vizita ne’e, Prezidente Repúblika José Ramos Horta sei partisipa Fórum Daruak Futuru ASEAN ho tema “Konstrui ASEAN ida unida, inkluziva no rezilente iha kontextu transaformasaun globál sira Nia leet”.
Tuir ajenda ne’ebé Tatoli asesu, Prezidente Repúblika José Ramos Horta sei hala’o enkontru bilateral nivel aas ho lideransa Vietname nian. Iha tersa (25/02) iha tuku 07h00 dadeersan, PR Horta sei hala’o enkontru dahuluk ho Prezidente Vietnam, Luong Coung no Sekretáriu Jerál Partidu Komunista Vietnam, To Lam.
Enkontru ne’ebé realiza iha Breagfast Otél Melia ne’e sei hametin ligasaun diplomátika entre Timor-Leste no Vietname, no sei hatutan ho diskusaun kona-ba kooperasaun no dezenvolvimentu rejionál.
Hafoin Inkontru ne’e, Xefe estádu sei kontinua partisipa iha serimónia abertura Fórum Futuru ASEAN 2025 ne’ebé realiza iha Otél Meliá iha tuku 14h00 lorokraik oras Vietname liuhusi sesaun jantar hamutuk.
Iha Fórum Futuru ASEAN nian ne’e, Prezidente Repúblika José Ramos Horta sei hato’o diskursu prinsipál iha serimónia abertura no partisipa iha sesaun Q&A nivel aas hamutuk ho Primeiru-Ministru Vietname, S.E. Pham Minh Chinh, Primeiru-Ministru Malázia nian, Rt. Hon. Dato’ Seri Anwar bin Ibrahim no Primeiru-Ministru Nova Zelandia, Rt. Hon. Christopher Luxon.
Fórum Futuru ASEAN 2025 serve hanesan plataforma signifikativu ida ba diálogu rejionál kona-ba asuntu krítiku sira inklui avansu teknolójiku, seguransa abranjente no papél ASEAN nian iha paizajen globál ida ne’ebé kompleksu ba beibeik.
Partisipasaun Timor-Leste nian iha Fórum ne’e subliña ninia kompromisu ba integrasaun rejionál no ninia viajen la’o hela ba adezaun ba ASEAN. Nasaun kontinua halo progresu signifikativu iha prosesu adezaun.
Partisipasaun Timor-Leste nian refleta TL nia kompromisu metin ba kooperasaun rejionál no prontidaun atu kontribui ho signifikativu ba vizaun komún ASEAN nian ba dezenvolvimentu sustentavel no prosperidade. Hanesan TL nia progresu iha viajen adezaun ba ASEAN, TL hakarak servisu besik ho nasaun viziñu sira atu rezolve dezafiu komún no kaer oportunidade sira ba kresimentu koletivu.
Nu’udar nasaun ne’ebé kompromete ba dezenvolvimentu sustentavel no kooperasaun rejionál ne’ebé aumenta, Timor-Leste hakarak kontribui ba diskusaun sira kona-ba mudansa klimátika, tranzisaun enerjia, no hametin rezilienté rejionál liu husi asaun koletivu no kolaborasaun.
Prezidente nia delegasaun inklui ofisiál superiór sira governu nian husi Ministériu Negósiu Estranjeiru no Kooperasaun, ne’ebé hatudu Timor-Leste nia kompromisu makaas atu envolve ho parseiru rejionál sira no kontribui ba vizaun kompartillada ASEAN nian ba futuru.
Enkuantu, hafoin vizita servisu ne’e iha Hanoi Vietname, tuir ajenda, Xefe Estádu sei fila hikas ba Timor-Leste iha kinta (27 Fevereiru 2025) ne’e.
Notísia Relevante: PN autoriza PR Horta hala’o vizita Estadu bá Vietname
Jornalista : Sérgio da Cruz
Editór : Cancio Ximenes
