DILI, 24 Fevereiru 2025 (TATOLI)—Prezidente Repúblika, José Ramos Horta, segunda ne’e, dezloka ba Vietname hodi partisipa Fórum Futuru ASEAN 2025.
Notísia Relevante: PN autoriza PR Horta hala’o vizita Estadu bá Vietname
“Forum ne’e ho tema “Harii ASEAN ne’ebé Unidu, Inkluzivu no Reziliente iha Transformasaun Global sira-nia leet,” halibur líder rejionál sira atu diskute kona-ba futuru ASEAN nian no responde ba dezafiu xave sira-ne’ebé rejiaun hasoru,” refere nota imprensa ne’ebé Agência TATOLI asesu, ohin.
Durante ninia vizita servisu hahú husi loron 24-26 Fevereiru 2025 ne’e, Horta sei hala’o enkontru bilaterál nivel aas ho lideransa Vietname nian, Prezidente Vietname Luong Cuong no Sekretáriu Jerál Partidu Komunista Vietnam nian, To Lam.
Enkontru hirak-ne’e sei hametin ligasaun diplomátika entre Timor-Leste no Vietname, no sei avansa diskusaun kona-ba kooperasaun no dezenvolvimentu rejionál.
Iha Fórum Futuru ASEAN nian, Prezidente Horta sei hato’o diskursu prinsipál iha serimónia abertura Fórum nian no partisipa iha sesaun Q&A nivel aas hamutuk ho Primeiru-Ministru Vietname, Pham Minh Chinh, Primeiru-Ministru Malázia, Rt. Hon. Dato’ Seri Anwar bin Ibrahim, no Primeiru-Ministru Nova Zelandia, Rt. Hon. Christopher Luxon
Fórum Futuru ASEAN 2025 serve hanesan plataforma signifikativu ida ba diálogu rejionál kona-ba asuntu krítiku sira inklui avansu teknolójiku, seguransa abranjente no papél ASEAN nian iha paisajen globál ida-ne’ebé kompleksu ba beibeik.
Partisipasaun Timor-Leste nian iha Fórum ne’e subliña ninia kompromisu ba integrasaun rejionál no ninia viajen la’o hela ba adezaun ba ASEAN. Nasaun kontinua halo progresu signifikativu iha prosesu adezaun.
“Fórum Futuru ASEAN reprezenta plataforma importante ba diálogu no kolaborasaun hanesan ita-nia servisu hamutuk atu harii Sudeste Aziátiku ne’ebé integra no rezilienté liu,” Prezidente Repúblika, José Ramos Horta, hateten.
Partisipasaun ne’e refleta Timor-Leste nia kompromisu metin ba kooperasaun rejionál no prontidaun atu kontribui ho signifikativu ba vizaun komún ASEAN nian ba dezenvolvimentu sustentavel no prosperidade.
“Hanesan ami progresu iha ami-nia viajen adezaun ba ASEAN, ami hakarak servisu besik ho ami-nia viziñu sira atu rezolve dezafiu komún no kaer oportunidade sira ba kresimentu koletivu,” Horta dehan.
Nu’udár nasaun ne’ebé kompromete ba dezenvolvimentu sustentavel no kooperasaun rejionál ne’ebé aumenta, Timor-Leste hakarak kontribui ba diskusaun sira kona-ba mudansa klimátika, tranzisaun enerjia no hametin rezilienté rejionál liuhusi asaun koletivu no kolaborasaun.
Prezidente nia delegasaun inklui ofisiál superiór sira Governu nian husi Ministériu Negósiu Estranjeiru no Kooperasaun, ne’ebé hatudu Timor-Leste nia kompromisu makaas atu envolve ho parseiru rejionál sira no kontribui ba vizaun kompartillada ASEAN nian ba futuru.
TATOLI
