DILI, 24 Fevereiru 2024 (TATOLI) – Institutu Nasionál Estatístika Timor-Leste, Institutu Públiku (INETL, I.P) rejista, iha Janeiru 2025, deflasaun 0,2% iha Índise Presu Konsumidór (IPK), kompara ho fulan-Dezembru 2024 rejista inflasaun ho persentajen 0,2%.
Tuir dokumentu INETL, redusaun ba presu sira ne’e tanba hetan kontribuisaun husi folin hahán no bebida la’os alkoólika tun 0,2%, transporte 0,6%, rekreasaun no kultura 0,2%, hatais no sapatu 0,1%.
“Grupu ekipamentu no manutensaun mobiláriu uma-laran sa’e 0,4%, álkool no tabaku sa’e 0,2%, edukasaun sa’e 0,4% no uma sa’e 0,1%, sai hanesan mudansa kontráriu ba inflasaun grupu hotu”, dokumentu ne’e dehan.
Relasiona ho grupu hahán no bebida la’ós alkoólika tun 0,2% tanba hetan impaktu maioria husi subgrupu foos 0,5%, masin-midar, marmelada, bani-been, xokolate no hahán midar 1,2%, modo-tahan 0,3%, na’an 0,2%, kafé, xá, no kakao 0,6%, ai-fuan 0,4% no ikan no hahán tasi 0,1%.
Relasiona subgrupu susu-been, keiju no manu-tolun sa’e 1,0%, no bee, bebida ai-fuan no modo-tahan sa’e 2,4%, ne’ebé sai hanesan mudansa kontráriu ba inflasaun grupu hahán no bebida la’ós alkoólika.
Persentajen IPK anuál rejista diminuisaun 0,2% iha Janeiru 2025 kompara ho períodu omólogu Janeiru 2024, hetan kontribuisaun husi grupu transporte 2,2%, álkool no tabaku 2,1%, ekipamentu no manutensaun mobiláriu uma-laran 0,1%, uma 0,6% no komunikasaun 0,9%.
Ba grupu hahán no bebida la’ós alkoólika sa’e 0,2%, edukasaun 0,4%, saúde 2,3% hatais no sapatu 0,4% no rekreasaun no kultura 0,2%, ida-ne’e sai hanesan mudansa kontráriu ba inflasaun grupu hotu ba anuál Janeiru 2025.
Notísia relevante: Inflasaun iha Dezembru sa’e 0,2%
Jornalista: Arminda Fonseca
Editora: Maria Auxiliadora
