VIETNAME, 25 Fevereiru 2025 (TATOLI)—Prezidente Repúblika, José Ramos Horta, tersa ne’e, hala’o vizita kortezia ba Komite Sentrál Partidu Komunista Vietname hodi hasoru malu ho Sekretáriu Jerál, To Lam, iha Hanoin, hodi ko’alia kona-ba avansu dezenvolvimentu ne’ebé la’o iha territoriu Timor-Leste no louva relasaun bilaterál entre Timor-Leste.
Notísia Relevante: PR Horta ohin dezloka ba Vietname partisipa Fórum Futuru ASEAN 2025
Prezidente Repúblika, José Ramos Horta, apresia no hato’o agradesimentu ba Vietname liuliu Jenerál To Lam ne’ebé fó apoia másimu ba Timor-Leste atu sai membru permanente ASEAN.
“Ha’u hato’o agradesimentu ba Vietname nia apoiu kontinua ba Timor-Leste nia prosesu ba adezaun tomak ba ASEAN,” Prezidente Repúblika, José Ramos Horta, hateten ba jornalista sira.
Kona-ba adezaun ba ASEAN, PR Horta hatudu otimizmu katak ida-ne’e bele akontese iha simeira ASEAN nian iha Outubru ka Novembru 2025 no kona-ba kontribuisaun potensiál Timor-Leste nian ba ASEAN.
“Ita mantein ita-nia nasaun iha pás no estabilidade, ita la lori problema ruma ba ASEAN. Timor-Leste serbisu maka’as iha liña oin hodi kria burokrasia ida-ne’ebé amigável ba ambiente negósiu,” nia dehan.
Xefe Estadu observa katak dezde ninia vizita ikus ba Vietname iha fulan neen liubá, Timor-Leste halo ona progresu signifikativu, tanba prezidente trasa katak iha tinan 2025 ne’e Governu Timor-Leste sei foka ba infraestrutura, estrada nasionál no rurál, agrikultura no eskola sira.
Prezidente temi Timor-Leste nia planu atu harii aeroportu foun, dezenvolve portu Dili tuan, kombate ki’ak no mánutrisaun no habelar parseria ho Vietname iha área sira hanesan agrikultura no komunikasaun.
Durante enkontru, Prezidente Ramos Horta subliña progresu iha aumentu parseria komersiál sira ba atualizasaun konetividade no ligasaun fiu submarinu.
Prezidente mós hato’o kona-ba fundu soberanu Timor-Leste nian no oportunidade atu halo investimentu iha Vietname.
Sekretáriu Jerál Partidu Komunista Vietname, To Lam, fó benvindu ba Prezidente Horta no no hato’o agradesimentu ba Prezidente José Ramos Horta nia prezensa iha Fórum Futuru ASEAN nian ba dala-rua iha tinan ida-ne’e, hodi destaka kreximentu eselente dezenvolvimentu no relasaun bilaterál entre nasaun rua ne’e.
Jenerál To Lam nota Vietname nia objetivu atu dezenvolve ba nasaun ida ho rendimentu aas no espresa esperansa ba kooperasaun estratéjiku ho Timor-Leste, enkuantu reafirma nafatin Vietname nia apoiu ba Timor-Leste nia adezaun ba ASEAN.
Sekretáriu Jerál To Lam afirma katak Vietname laiha kestaun ho Timor-Leste no nasaun rua iha konsensu iha aspetu hotu-hotu liuliu apoiu Vietname nian ba Timor-Leste sai membru foun ba ASEAN.
Notísia Relevante: PR Horta ho delegasaun to’o ona iha Vietname
Jornalista : Sérgio da Cruz
Editór : Cancio Ximenes
