OEKUSI, 26 Fevereiru 2025 (TATOLI) – Estrada kotu kuaje metru 50-resin iha bairru Oébola, aldeia Hau-Ufe, suku Lela-Ufe, sub-rejiaun Nítibe, Oekusi difikulta komunidade sira atu viajen ba merkadu no asesu ba postu saúde iha aldei Bebu.
“Horsehik ekipa Autoridade RAEOA mai haree ona tanba estrada ne’e kotu iha semana kotuk bainhira udan bo’ot mak rezulta rai halai, ne’ebé difikulta tebes komunidade sira iha aldeia Hau-Ufe atu bá aldeia Bebu, tanba estrada kotu metru-50 resin hanesan ne’e,” Xefe suku Lela-Ufe, José Neno Sila, ba Ajénsia Tatoli, I.P iha Oekusi, ohin.
Notísisia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe
Autoridade komunitária ne’e, informa dalan ne’e husi Nun-Ana atu liga bá komunidade sira iha aldeia Bebo no igreja Oálfab no postu saúde Bebo nian, nune’e karreta labele liu, só motorizada de’it
“Agora dalan ida-ne’e kotu difikulta tebes bainhira komunidade sira moras karreta labele transporta tanba dalan kotu. Nune’e nia husu parte relevante halo normalizasaun,”nia espera.
Nia lembra, katak projetu ne’e konstrui iha 2024 husi Programa Nasionál Dezenvolvimentu Suku (PNDS) ho valór kontratu rihun $41, kategória projetu reabilitasaun estrada rabat-beton ka nahe simentu ho besi.
Hataan ba rekomendasaun ne’e, Asesór Prezidente Autoridade RAEOA ba Asuntu Sosiál, Agustinho Caet, informa, sei komunika ho Diresaun Rejionál Infraestrutura (DRI), nune’e bele halo normalizazaun
“Ha’u mai haree tanba hetan kontaktu husi autoridade lokál Xefe suku Lela-Ufe, ne’ebé ohin ha’u mai haree ona, ita observa loos duni estrada ne’e presiza konsidera, ne’ebé ita sei hato’o ba parte relevante sira liu liu obra públika, atu bele rezolve iha tempu badak tanba dalan ne’e alternativu tebes ba komunidade sira iha aldeia Bebo,” nia promete.
Tuir dadus sensus populasaun 2022, totál populasaun iha suku Lela-Ufe hamutuk 3.807, kompostu husi mane 1.937 no feto 1.870, husi uma-kain 787 no iha aldeia haat mak Bebo, Hau-Ufe, Kuat-Enes no Mahata
Notísia relevante:Dalan alternativa husi suku Bobokase liga bá Kutete kotu
Jornalista: Abílio Elo Nini
Editor: Florencio Miranda Ximenes
