DILI, 27 Fevereiru 2025 (TATOLI)-Xefe Ekipa Komisaun Tékniku Apoiu (CTA-sigla portugés), ba jogu entre Komunidade Nasaun ko’alia lian-portugés (CPLP, sigla portugés), Jorge de Carvalho, hateten ekipa CTA identifika ona fatin sira ba jogu CPLP nian.
Fasilidade sira hanesan estádiu munisipál ba futeból no atletismu, jináziu ba atividade taekwondo no karate, xadrez iha Sentru Konvensaun Dili, voleiból no basketból iha Lesidere.
“Ba ami hanesan onra boot ida simu hosi Primeiru-Ministru, figura ida ne’ebé koñesidu internasionalmente, líder karizmátiku no agora nu’udar Primeiru-Ministru. Tanba ne’e, fó onra hodi aprova iha Konsellu Ministru apoiu ba jogu CPLP nian, apoiu hosi polítiku”, Xefe Ekipa CTA dehan ba jornalista sira iha Palásiu Governu, kinta ne’e.
Nia hatutan, aspetu seluk ne’ebé importante tebes mak preokupasaun ne’ebé hato’o husi ita-nia Primeiru-Ministru atu ita-nia jerasaun foun sira hetan konxiénsia kona-ba atividade fízika ho desportu, nune’e ema barak liután ne’ebé prátika desportu. Nune’e desportu bele to’o nivel internasionál. Haree karik Timor iha nível prátika ne’ebé di’ak, ne’e importante ba saúde, maibé importante ba ekonómia, tanba bele atrai eventu internasionál ne’ebé atu organiza iha Timor-Leste.
Xefe ekipa CTA hatete, kuandu ema halo viajen hodi asiste no partisipa iha eventu sira iha Timor hanesan nasaun sira seluk, sira promove hela turizmu no istória povu ida-ne’e nian iha nível internasionál.
“Mai ita hotu servisu hamutuk, atu Timor bele manán, la’os manán de’it medalla, manán Luzofonia em termos pobreza no eskluzaun ba dezenvolvimentu ekonómia. Tanba, desportu iha papel importante tebes hanesan instrumentu ba dezenvolvimentu.
Tanba ne’e, nia dehan kontinua fó apoiu ba Ministériu Juventude Desportu, Arte no Kultura.
Iha eventu ne’e sei hato’o informasaun kona-ba jogu CPLP, konferénsia ministru sira-nian no forum joventude ba públiku kona-ba étika no desportu, kompetisaun sira, sei iha dansa kulturál no vizita ba Kristu-Rei no sosa sasán lembransa sira ne’ebé Timor-Leste iha.
Notísia relevante: Ekipa CTA hahú observa kampu ba jogu CPLP
Jornalista : Osória Marques
Editora : Rita Almeida
