DILI, 04 Marsu 2025 (TATOLI) – Konsellu Administrasaun Fundu Infraestrutura (KAFI) sei implementa, iha tinan 2025, projetu foun hamutuk 704.
“Ita iha projetu foun hamutuk 704 ho nia montante orsamentu millaun $121,81”, Ministru Planeamentu no Investimentu Estratéjiku, atuál Prezidente KAFI, Gastão de Sousa informa ba Tatoli, iha Fatuhada, ohin.
Projetu boot no foun ne’e maioria husi Ministériu Obra Públika (MOP), Ministériu Agrikultura, Pekuária, Peska no Floresta (MAPPF), Ministériu Edukasaun (ME) no Ministériu Saúde no seluk tan.
Governante ne’e esplika katak projetu husi MAPPF ne’e kuaze kona-ba irrigasaun nian no balun KAFI aprova ona ba konkursu públiku mak hanesan irrigasaun ida iha Zumalai-Kovalima ho totál kustu millaun $16 no seluk husi Betanu-Manufahi ho orsamentu millaun $9.
Ba projetu husi MOP nian kona-ba estrada iha pakote barak ne’ebé lansa ona konkursu públiku mak hanesan estrada iha munisípiu Lautein bá Lospalos Vila no postu administrativu Lautein bá suku Com ho verba millaun $36 no seluk tan.
Aleinde ne’e, KAFI mós aprova ona projetu ida mai husi orsamentu empréstimu mak estrada husi Gleno bá Letefoho ho nia totál kustu millaun $40-resin.
Ba projetu ki’ik sira seluk ne’ebé tinan ne’e KAFI sei aprova ba konkursu públiku mak obra husi Ministériu Saúde nian ba harii postu sanitáriu sira no sentru saúde no rezidénsia ba médiku sira. Projetu husi Ministériu Interiór nian mak sei halo postu Polísia sira iha fronteira terrestre, inklui iha Oekusi no ba Ministériu Edukasaun nian mak kona-ba konstrusaun eskola.
Relembra katak, iha 2024, orsamentu ne’ebé aloka ba KAFI hamutuk millaun $301, husi montante ne’e konsege ezekuta millaun $226 ka porsentu 75%.
Notísia relevante: PM fó atensaun ba servidór Estadu atu haree ba implementasaun kualidade projetu
Jornalista: Arminda Fonseca
Editora: Maria Auxiliadora
