LAUTEIN, 05 Marsu 2025 (TATOLI)—Prezidente Autoridade Munisipiu (PAM) Lautein, Melio de Jesus hateten, komunidade Lautein kuaze 78% mak asesu ona ba bee-moos.
“Kona-ba bee-moos nian iha Lautein, ita-nia komunidade ne’ebé seidauk asesu bee-moos ne’e hela 22%, maibé ita tenta nafatin atu dada bee-moos ba ita-nia komunidade,” Melio de Jesus hateten ba Agência TATOLI iha nia kna’ar fatin iha Lautein, tersa (04 Marsu 2025) ne’e.
Iha tinan 2024, nia dehan, konsege dada ona kanalizasaun bee-moos ba komunidade iha Lorehe, iha Muapitini, dada mós iha Ailari-Nuluru besik finaliza no daudaun ne’e hahú fali iha Serelau no Soru.
“Prosesu sira sei kontinua la’o, ita-nia alvu ba to’o iha 2027, komunidade hotu iha Lautein bele asesu ona ba bee-moos ne’e liuhusi Programa Dezenvolvimentu Integradu Munisípiu (PDIM) no ajuda husi Agência internasionál hanesan UNDP,” nia dehan.
Alenide ne’e, nia hateten, la taka dalan mós ba projetu sira husi nasionál atu dada bee-moos ba komunidade.
“Ita nafatin loke dalan ba nasionál atu bele lori projetu sira hanesan dada bee-moos mai iha Munisípiu Lautein. Foin lalais, ita hetan orsamentu husi Governu sentrál hamutuk millaun $22 husi Ministériu Obra Públiku (MOP) ne’ebé sei konstrui bee-matan boot ida iha Munisípiu Lautein ne’ebé kolokadu iha áre Saiwaca. Ida-ne’e atu fornese ba komunidade iha Postu Administrativu Lospalos Vila hamutuk uma kain rihun-33,” nia relata.
Totál Orsamentu Jerál Estadu (OJE) 2025 ba Munisípiu Latein hamutuk millaun $8.6. Husi totál ne’e, fahe ba kapitál dezenvolvimentu hamutuk rihun $900 ne’ebé sei implementa ba projetu hamutuk neen (6) ne’e foun ho nia orsamentu hamutuk rihun $500-resin.
Maibé ba Munisípiu Lautein ba tinan ida-ne’e ho projetu hotu ne’ebé tau husi munisípiu rasik no Governu sentrál liuhusi fundu infrastrutura kona-ba hadi’a estrada sira, loke merkadu munisípiu nian foun no projetu seluk tan hamutuk millaun $240.
Jornalista : Hortencio Sanchez
Editór : Cancio Ximenes
