BOBONARU, 07 marsu 2025 (TATOLI)—Autoridade Munisípiu Bobonaru sei implementa projetu Planu Dezenvolvimentu Integradu Munisipál (PDIM) tinan 2025 iha tempu badak, tanba daudaun ne’e hahú ona faan dukumentu ba kompañia sira-ne’ebé iha interrese atu konkorre.
Notísia Relevante:
Autoridade Bobonaro sei implementa projetu PDIM 13
“Tuir oráriu, ita sei selebra kontratu ho kompañia sira iha sesta (28 Marsu 2025), signifika katak iha loron ne’e kedas sira implementa ona. Ita sei fó sira fulan ida para bele lori materiál ba terrenu, depois mak ami sei haruka enjineiru sira ba haree,” Diretór Planu Dezembvimentu Integradu Munisipál (PDIM) Munisípiu Bobonaru, Rui Berre Mau Barros, informa ba jornalista sira iha nia kna’ar fatin, sesta ne’e
Iha tersa (04 Marsu 2025) ne’e, nia dehan, parte Aprovizionamentu Sekretáriadu Autoridade Munisípál Bobonaru hahú faan ona dukumentu konkursu ba kompañia sira atu sosa, no tuir kalendáriu iha kuarta (12 Marsu) semana oin ne’e, sei halo Private Meeting ho kompañia sira no iha kinta (13 Marsu) kontinua halo Site Visited.
“Depois ida-ne’e, iha loron 20 Marsu mai ne’e, sira submete ona Quotasaun ne’e mai Autoridade hodi loke ninia rezultadu. Tuir oráriu ne’e, iha 28 Marsu ne’e, sei selebra kontratu ho kompañia sira,” nia hateten.
Totál projetu PDIM tinan 2025 ne’ebé Autoridade Munisípiu Bobonaru hetan hamutuk neen (6), hanesan konstrusaun Uma Maternidade iha Sentru Saúde Maliana iha suku Ritabou, Konstrusaun Irrigasaun Genumatan, Konstrusaun eskola sala neen iha Samutaben, postu administrativu Kailaku, Konstrusaun eskola sala tolu iha Ensinu Baziku Filiál (EBF) Beamuas, Reablitasaun Rezidénsia Pesoál saúde iha postu Bobonaru no Konstrusaun Jardín iha Autoridade Munisípiu Bobonaru.
Tuir nia, projetu neen (6) ne’e sei gasta orsamentu kuaze rihun $910 no husi montante ne’e sei bele aumenta tan projetu bainhira iha orsamentu poupansa.
“Ita iha projetu Rezidénsia Pesoál Saúde Bobonaru ne’e tuir kalkulasaun tékniku sira nian, primeiru ne’e rihun $140 maibé sira ba halo kalkulasaun finál ne’e osan ne’e tun fila-fali ba rihun $123. Osan restu ne’e, ita halo ba orsamentu poupansa, ita bele aumenta tan projetu ida ou rua tan,” nia dehan.
Enkuantu, iha tinan 2024 ne’e, Autoridade Munisípiu Bobonaru hetan projetu PDIM hamutuk 13 no aumenta tolu (3) ho orsamentu poupansa.
Notísia Relevante: OJE 2025 ba Bobonaro la sufisiente atu responde preokupasaun iha baze
Jornalista : Sergio da Cruz
Editór : Cancio Ximenes
