OEKUSI, 07 Marsu 2025 (TATOLI) – Edifísiu Eskola Bázika Filiál (EBF) Lamasin, ne’ebé lokaliza iha suku Bene-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA) ameasadu husi estragu husi erosaun ka rai halai.
Koordenadór EBF Lamasin, Lazaro Bacun, informa dezastre naturál ne’e akontese iha 2024 rezulta rai halai komesa husi eskola oin no kotuk. Tan ne’e nia rekomenda ba servisu edukasaun atu konsidera.
Notísia relevante:Agrikultura Oekusi apoia ai-oan 300 ba EBF Lamasin
“Eskola ne’e ita haree ho matan, katak ambiénte eskola iha risku tebes, iha eskola oin ita sama rai hanesan rai tahu, husi kotuk no sorin komesa nakfeka no halai to’o ona kraik, entaun ida-ne’e fó ameasa ba fasilidade Estadu ne’e, nune’e prosesu aprendizajén bele lao di’ak”, dehan Lazaro Bacun, iha EBF Lamasin foin lalais ne’e.
Iha fatin seluk, Jestór sub-rejiaun Nítibe, Agustinho Afulit, rekoñese kondisaun EBF Lamasin iha risku, nune’e nia sei koordena ho Diresaun Rejionál Infraestrutura inklui kompañia atu halo reabilitasaun no servisu edukasaun atu apoia.
“Ami agradese tanba foin daudaun husi agrikultura apoia ona ai-oan atu kuda iha área eskola ne’e, maibé solusaun seluk mak presiza tau iha planu muda eskola ka ou halo fali aterru foun tanba eskola ne’e ita haree ameasadu tebes ba estudante sira”, nia afirma.
Hatan ba rekomendasaun ne’e, Diretór Edukasaun Oekusi, Vincencio Cono, promete sei fó solusaun maibé sei koordena ho Sekretária Rejionál Asuntu Edukasaun, nune’e bele tau iha planu.
“Ha’u sei informa ba Sekretária Rejionál, atu ami haree asuntu ne’e, tanba eskola ne’e harii kedas iha mandatu Autoridade Anteriór, ita presiza hadi’a atu fó solusaun di’ak, tanba eskola ne’e nesesáriu ba alunu sira. Tanba Lamasin ne’e fatin izoladu presiza eskola di’ak, tan ne’e ami sei buka nia solusaun bele tau iha planu atu hadi’a urjente,” nia hateten.
Entretantu, totál estudante iha Eskola Bázika Filiál (EBF) Lamasin hamutuk 42 ho totál profesór hamutuk na’in-tolu.
Notísia relevante:Garante kualidade apredizajen, Edukasaun Oekusi kontinua implementa programa EMuLi
Jornalista: Abílio Elo Nini
Editór: Florencio Miranda Ximenese
