KOVALIMA, 07 Marsu 2025 (TATOLI) –Hahú Janeiru to’o Fevereiru 2025 ne’e, Inspesaun Jerál Traballu (IJT), munisípiu Kovalima foin hala’o vizita ba empreza sia no empreza sira seluk seidauk halo vizita maibé IJT nafatin halo esforsu hodi bele atinji PAA 2025 .
“Iha 2025 ne’e, ami-nia programa prioridade mak halo vizita inspesaun ba empreza sira hanesan empreza konstrusaun, loja, otelaria no prodús batako ami la defini”, Inspetór Jerál Traballu Rejionál Munisípiu Kovalima, Gabriel Gusmão, dehan ba TATOLI iha AMC, ohin.
Bazeia ba Planu Asaun Anuál (PAA) 2025 ne’e , IJT sei vizita empreza 34, husi númeru ne’e IJT foin hala’o vizita empreza sia no empreza 25 seidauk.
Inspetór ne’e dehan, tama ona iha marsu IJT foin hala’o vizita empreza sia tanba kada empreza funsionáriu IJT sei hala’o vizita empreza ba dala haat, nune’e ba empreza 34 ne’e, totál sei hala’o vizita ba dala-136.
Ho nune’e IJT kontinua hala’o esforsu hodi efetua vizita ba empreza sira nune’e bele atinje meta ne’ebé mak define ona iha PAA 2025 nian.
Objetivu IJT hala’o vizita ba empreza sira, nia informa, atu haree traballadór ne’ebé presta servisu iha empreza hodi haree sira-nia seguransa saúde no traballu, kondisaun traballu, seguransa sosiál no mós kolokasaun empregu no dezempregu.
Jornalista: Celestina Teles
Editór: Rafael Ximenes de A. Belo
