DILI, 10 Fevereiru 2025 (TATOLI) – Eis-Vise-Diretora Ezekutiva Servisu Rejistu no Verifikasaun Emprezariál (SERVE, I.P), Agusta Gomes, respeita desizaun Konsellu Ministru, ne’ebé ezonera nia husi kargu, maibé nia parte ho prinsípiu rejeita aktu korrupsaun.
Tanba seidauk hetan karta ruma husi Governu, maka Agusta Gomes ohin tama hodi entrega serbisu ba funsionáriu sira, maibé Diretór-Ezekutivu SERVE, I.P, Fausto Dias, la fó autorizasaun tanba laiha ona relasaun serbisu ho instituisaun nian.
“Ha’u kontente bainhira diretór-ezekutivu akompaña ha’u halo hela karifikasaun balun relasiona ho ezonerasaun ne’e, maibé nia dehan laiha ona relasaun serbisu liga instituisaun nian. Entaun, hanesan feto hakru’uk ba desizaun superiór no Konsellu Ministru, ha’u kumpri maibé injustisa ita labele taka-matan. Ezonerasaun ne’ebé maihusi Konsellu Ministru, frankamente atu ko’alia katak halo ezonerasaun ba pozisaun vise-diretora la’ós ba iha kapasidade Agusta nian”, nia hateten iha Kaikoli, ohin.
Nia hatutan katak dezde restaurasaun indepedénsia, iha 2025, mak feto Timór dahuluk hetan ezonerasaun husi Ministru Koordenadór ba Asuntu Ekonómiku (MAKE), liuhusi Konsellu Ministru no ida-ne’e marka istória ba nia no sai esperiénsia ba feto hotu katak nafatin firme ko’alia lialoos.
“Se imi husu ha’u aseita korrupsaun, sim, se rejeita sai. Entaun, ha’u hili rejeita ne’e sai duké ha’u hili korrupsaun, tanba-ida ne’e ha’u-nia prinsípiu”, nia afirma.
Agusta Gomes ne’ebé foin kompleta hala’o knaar durante fulan 10 depoizde hetan nomeasaun iha Maiu 2024 no simu pose iha loron 03 Juñu 2024 simu kompeténsia mak haree ba funsionamentu serbisu SERVE, I.P nian mak promove prátika no atu ba iha rejistu komersiál nian no garante funsionamentu serbisu ba sidadaun sira-nia satisfasaun no justu ba sosiedade.
“Hanesan asaun fundamentál ne’ebé ita ko’alia, tanba ita iha responsabilidade no devér husi instituisaun ida-ne’e, tanba ne’e mak ho ezonerasaun ida-ne’e ha’u presiza atu klarifika tanba instituisaun SERVE, I.P presta (serbisu) tuir dekretu lei númeru 35/2012. SERVE, I.P transforma sai institutu públiku ho dekretu-lei númeru 7/2017 nian”, dehan.
Nia haktuir katak ho nomeiasaun ne’e mak diretór no vise-diretora atu garante serbisu SERVE no prosesu ne’e la’o ho objetivu atu fó asisténsia ba públiku ho profisionál hodi alkansa serbisu ne’ebé efetivu no justu iha prosesu implementasaun nian.
“Maibé atu ko’alia kona-ba rezultadu serbisu durante fulan 10 labele define, bainhira serbisu instituisaun ne’e frankamente iha hela pontu balun ne’ebé labele duni atu fó espasu iha ne’ebá atu vise hala’o nia serbisu”, nia lamenta.
Nia mós ko’alia kona-ba públiku ne’ebé kestiona razaun saida mak halo ezonerasaun, maibé ida-ne’e nia labele fó resposta tanba nia rasik mós la hatene. “Maibé atu responde ba dekretu-lei númeru 7/2017, iha artigu 11, bainhira atu halo ezonerasaun ida tenke mai ho kauza. Entaun kauza ne’e mak saida [hodi] sai evidénsia ba Vise-Primeiru-Ministru hodi responde ba artigu refere hodi submete proposta hodi hetan aprovsaun iha Konsellu Ministru. Iha públiku dalaruma kestiona tanba audiu ne’ebé espalla no seluk tan”, nia haktenik.
Agusta Gomes mós aprezenta pontu balun ne’ebé sai esensiál ba problema mak ameasa ba funsionáriu sira ho de’it kontratu; laiha atribuisaun kompeténsia serbisu husi diretór-ezekutivu ba nia vise; funsionamentu serbisu administrasaun ba gabinete vise-diretora la funsiona dezde nomeiasaun, tanba hetan impedimentu husi diretór-ezekutivu.
Pontu seluk mak delegasaun kompeténsia serbisu ba vise-diretora laiha durante auzénsia husi diretór, halo despaixu ba vise-diretora SERVE, I.P hodi halo kanselamentu serbisu ba atividade divulgasaun entre Ministériu Komérsiu no Indústria no SERVE, no pontu tuirmai mak relasiona ho audio ne’ebé espalla iha públiku kona-ba atu kobransa ilegál.
“Hanesan vise ha’u simu duni karta husi funsionáriu sira, maibé bainhira ha’u haree diretór nia naran mós iha, entaun konfidensialmente ha’u labele hato’o ba diretór, maibé hakarak ka lakohi karta hirak ne’e ha’u tenke lori bá entrega instituisaun tutelada, oinsá haree prosesu ba oin”, Agusta dehan.
“Maibé ha’u labele koalia buat barak, husik Justisa halo nia serbisu hodi bolu funsionáriu hirak ne’ebé sente na’in ba kontribuisaun husi kobransa ne’e bá hodi justifika. Hanesan sidadaun, ita nafatin fó apoiu no kolabora hodi akompaña prosesu hirak ne’e”, nia adianta.
Nia mós haktuir katak durante fulan 10 hala’o knaar, diretór-ezekutivu halo limitasaun no fó orden ba parte finansa labele asesu tomak ba iha ezekuasaun orsamentál instituisaun nian, la autoriza hatene dadus rejistu komersiál no kontratu ba funsionáriu sira.
Relasiona ho kestaun ne’e, jornalista TATOLI tenta entrevista ho Diretór-Ezekutivu Fausto Dias, maibé lakohi fó resposta ba asuntu ne’e no haruka jornalista ba konfirma iha Ministru Koordenadór ba Asuntu Ekonómiku. Antes ne’e mós jornalista konfirma ho Ministru Kalbuadu Lay maibé la fó komentáriu.
Notísia relevante: Agusta Gomes ezonera ona husi kargu Vise-Diretora Ezekutiva SERVE, I.P
Jornalista: Arminda Fonseca
Editora: Maria Auxiliadora
