OEKUSI, 10 Marsu 2025 (TATOLI)– Grupu negósiu feto na’in-46, iha Rejiaun Administrativa Espesiál Oekusi Ambeno (RAEOA) tuir hela formasaun buka ideia ba mikro negósiu, ne’ebé fasilita husi Institutu Apoiu Dezenvolvimentu Emprezariál (IADE).
Koordenadór IADE Oekusi, Ermundo de Jesus Perreira, informa programa ne’e kontinuasaun husi tinan 2024 nian hodi hala’o durante semana ida, maibé fahe ba klase rua ho kada klase envolve ema 23, nune’e remata iha loron sábadu semana ne’e.
Notísia relevante:IADE nia programa FIN-KPNI, ajuda dezenvolve ona MPME hamutuk 34
“Formasaun ne’e ba grupu feto sira emprezáriu mikro negósiu no jogu fila-liman módulu I no II ne’ebé apoia direta mai husi Gabinete Prezidente Repúblika liuhusi Unidade Empodeeramentu Ekonomia Feto ba Família,” nia dehan iha Oekusi, ohin.
Nia hatutan: “Formasaun ne’ebé ami fasilita ho módulu jogu fila liman ka bisnis game no mós jestaun organizasaun ba grupu nian tanba partisipante ne’ebé husi Gabinete Prezidente Repúblika indika mai IADE Oekusi atu halo formasaun alvu ba grupu feto sira-ne’ebé hala’o negósiu, balun halo produsaun tais, balun loke kioske, kuda modo, faan dose,” nia afimra
Iha biban ne’e, Koordenadór Grupu Bertais Tai-Metan husi suku Bobokase, sub-rejiaun Pante Makasar, Paulina Elo, hato’o agradesementu ba Gabinete Prezidente Repúblika tanba apoia ona formasaun loron tolu ba grupu feto sira. Tanba grupu Bertais Tai-Metan ne’e maske ho atividade negósiu ki’ik, maibé bele mai partisipa formasaun hodi aumenta koñesimentu.
“Ohin, ami aprende atu jere ita-nia osan no oinsá hahú ita-nia negósiu tanba ami-nia negósiu ki’ik ne’e dalaruma to’o klaran ami-nia negósiu mate tanba ladun hatene dalan atu dezenvolve di’ak liutan, tan ne’e formasaun ne’e tulun ami atu jere ami-nia osan oinsá faan ami-nia produtu no prepara ho di’ak no kualidade,” nia dehan.
Entretantu, grupu feto na’in-46 ne’e identifikadu mai husi sub-rejiaun haat, Oesilo, Pássabe, Nítibe no Pante Makasar.
Notísia relevante:MKAE-RAEOA selebra akordu entegra kompeténsia IADE ba Oé-Cusse
Jornalista: Abílio Elo Nini
Editór: Florencio Miranda Ximenes
