VIKEKE, 11 marsu 2025 (TATOLI)—Governu liuhusi Ministériu Edukasaun (ME), tersa ne’e, rezolve ona problema menus mobiliáriu eskolár ne’ebé Eskola Ensinu Báziku Filiál Lasama iha suku Luca, postu Vikeke Vila, munisípiu Vikeke enfrenta durante ne’e, hodi distribui fasilidade mobiliáriu eskolár (meza no kadeira) hamutuk unidade 90 ba eskola refere.
Notísia Relevante: Estudante EBF Lasama Luca tuur iha rai partisipa ensinu aprendizajen
“Problema mobiliáriu eskolár ne’ebé durante ne’e ami-nia eskola enfrenta, ohin, Ministériu Edukasaun lori ona meza np kadeira ba ami-nia eslola hodi estudante sira uza ba partisipa ensinu aprendizajén. Ba kadeira no meza ne’ebé ohin lori ba ne’e, ami uza daudaun ona. Estudante sira mós sente kontente ba fasilidade ne’ebé ministériu fó apoiu ba ami,” Koordenadora Ensinu Báziku Filial (EBF) Lasama Luca, Eliza Soares Eliza Soares, hateten ba Agência TATOLI, iha postu Vikeke Vila.
Nia dehan, durante ne’e estudante EBF Lasama tuur iha rai mak partisipa ensinu aprendizajen, maibé agora EBF Lasama hetan ona kadeira no meza ne’ebé sufisiente ona ba estudante sira utiliza iha atividade aprendizajen loro-loron
“Tanba ne’e, ami hato’o agradesimentu ba Ministériu Edukasaun ne’ebé rona ami-nia halerik durante ne’e. Tanba, durante ne’e ami-nia kadaeira no meza laiha, estudante sira tuur iha rai de’it mak simu matéria husi profesór sira,” nia dehan.
Aleinde ne’e, problema menus mobiliáriu eskolár agora rezolve ona maibé hela problema saladeaula ba estudante no menus profesór mak seidauk rezolve, maibé husu nafatin ba Governu atu tau ba konsiderasaun.
“Problema ba meza no kadeira rezolve ona, profesór no saladeaula mak seidauk rezolve. Ba saladeaula foin lalais tékniku sira husi ME mai sukat ona, ne’ebé tékniku sira fó hatene ha’u sira sei ba halo dezeñu hodi tau ba planu perioridade. Ha’u espera, ba oin, ME bele rezolve ami-nia problema sira-ne’e,” nia hateten.
Tuir dadus, estudante sira husi primeiru ano to’o terseiru ano ne’ebé eskola iha EBF Lasama Luca ne’e ho totál estudante hamutuk 103 no totál profesór hamutuk na’in-ualu (8).
Jornalista : Vitorino Lopes da Costa
Editór : Cancio Ximenes
