VIKEKE, 12 Marsu 2025 (TATOLI)–Diretór Programa Dezenvolvimentu Investimentu Munisipál (PDIM) Viqueque, Joaquim Fernandes, informa iha tinan 2025 ne’e Governu sei implementa projetu PDIM projetu hamutuk lima (5) iha munisípiu Vikeke.
Notísia Relevante: Empreza lokál 42 konkorre konkursu públiku ba projetu PDIM iha Viqueque
Projetu lima ne’e kompostu husi reabilitasaun merkadu Olobai, suku Caraubalu, postu Vikeke Vila, reabilitasaunn sentru saúde postu Uatucarbau, konstrusaun uma maternidade iha postu Uatulari, irrigasaun Welafua no reabilita irrigasaun ba natar Futudu Buanurak, postu Ossú.
“Ba tinan 2025 ne’e, ita iha projetu lima. Irrigasaun rua (2), merkadu Olobai no saúde rua (2). Husi projetu lima ne’e, agora prosesu iha faze aprovizionamentu, depois ida-ne’e hotu segunda semana oin fó sai no ami sei halo rekursu durante loron lima nia laran ramata, ami taka sai ona hodi empreza sira komkore ba projetu lima referidu,” Diretór PDIM munisípiu Vikeke, Joaquim Fernandes, hateten ba TATOLI iha nia kna’ar fatin, administrasaun munisípiu Vikeke, ohin.
Nune’e, Joaquim dehan, projetu lima ne’e sei fó prioridade emprezáriu Vikeke-oan sira mak bele konkorre ba projetu sira-ne’e, empraza sira munisípiu seluk labele kompete ba projetu ne’e.
“Projetu lima ne’e empreza Vikeke oan de’it mak bele konkorre, empreza sira husi munisípiu seluk ami la autoriza kompete ba projetu lima. Nune’e konkursu públikasaun fulan ida to’o fulan rua atu empreza sira sosa dokumentu projetu lima ne’e. Depois konkursu públiku ba tenderizasaun ne’e sei ramata iha fulan Abríl ka Maiu, ami asina kontratu ho empreza manán-na’in sira,” nia hateten.
Tuir nia, projetu lima ne’e sei implementa konstrusaun iha fulan-Juñu hahú implementa konstrusaun obra fíziku, ho durasaun projetu fulan neen no tempu retensaun fulan tolu (3).
“Ba projetu lima ne’e ami labele fó sai orsamentu ba projetu ida-idak nian, tanba sei iha prosesu nian laran. Ba projetu lima ne’e ho totál orsamentu hamutuk $1,076,782, orsamentu ne’e mai husi Orsamentu Jerál Estadu (OJE) 2025 nian,” nia hateten.
Entretantu, projetu reabilitasaun merkadu Olobai, suku Caraubalu, postu Vikeke Vila sei benifisia ba pupulasaun hamutuk 16.563, reabilitasaunn sentru saúde postu Uatucarbau benifísia ba populasaun hamutuk 1.488.
Konstrusaun uma maternidade iha postu Uatulari benifísia ba populasaun hamutuk 4.362, irrigasaun Welafua sei benifísia ba populasaun Lakluta hamutuk 1.496 no reabilita irrigasaun ba natar Futidu Buanurak, postu Ossú binifísia ba populasaun 3.857.
Notísia Relevante: PDIM Viqueque laiha pesoál enjeñeiru hodi kontrola kualidade projetu
Jornalista : Vitorino Lopes da Costa
Editór : Cancio Ximenes
