OEKUSI, 12 Marsu 2025 (TATOLI) – Misaun Lepra Timor-Leste (MLTL) hamutuk ho Autoridade Rejiaun Administrativa Espesiál Oekusi Ambeno (RAEOA) liuhusi Sekretáriu Rejonál ba Asuntu Saúde, lansa livru matadalan ba pesoál saúde sira hodi kombate moras lepra iha Oekusi.
Biban ne’e, Diretora Ezekutiva MLTL, Afliana Lisnahan, informa livru ne’e espésifiku ba RAEOA de’it tanba hetan apoia másimu husi Sekretáriu Rejionál Saúde inklui médiku na’in-10 ne’ebé antes ne’e hala’o ona estudu iha nasaun Nepál, atu fasilita profisionál saúde ba atendimentu kazu lepra iha Oekusi.
Notísia relevante:MLTL formaliza akordu ho RAEOA hodi kombate moras lepra
“Ohin lansa livru matadalan atu ajuda pesoál saúde sira iha RAEOA, hodi oinsá halo diagnóstiku no tratamentu ba moras lepra, livru ne’e iha sesaun neen mak epidemolojia no servisu lepra iha Timor-Leste, diagnóstiku lepra,tratamentu ba kazu lepra, reasaun moras lepra, trata-aan rasik versaun ikusliu mak diagnóstiku diferensiál iha lepra,” nia informa, iha ámbitu lansamentu ne’e.
Nia esplika, iha livru ne’e la ko’alia de’it kona-ba prevensaun maibé barakliu ba diagnóstiku atu buka no deteta kazu lepra sedu no halo tratamentu sedu. Nune’e livru ne’e deskreve barakliu kona-ba jestaun moras lepra inklui mós oinsá halo prevensaun ba Ema ho Defisiénsia (EhD).
Iha biban ne’e, Sekretáriu Rejionál Saúde, Luís de Jesus Neno, agradese ba Misaun Lepra Timor-Leste tanba bele servisu hamutuk hodi kria matadalan ida atu haforsa profisionál saúde sira iha Oekusi.
Notísia relevante:MSSI koopera MS tau-matan ba pasiente lepra 23 iha RAEOA
“Ami sente kontente tanba servisu hamutuk entre saúde rejionál ho Misaun Lepra Timor-Leste, livru ne’e sei sai matadalan ba pesoál saúde sira iha RAEOA, atu tulun sira halo atividade deteta pasiente no kura pasiente lepra. Livru ne’e hakerek ona hodi sai referénsia ba sira,” nia orgullu.
Nune’e, nia konsidera livru matadalan ne’e sai mós fasilita pesoál saúde sira atu halo promosaun ba iha baze, nune’e komunidade sira bele iha koñesimentu prevene-aan husi bateria ne’ebé fó impaktu bo’ot ba komunidade sira.
Tan ne’e, nia apela ba pesoál saúde tomak iha Oekusi tantu iha ospitál sentru saúde to’o postu saúde sira, espera katak liuhusi livru ne’e hanesan matadalan ida hodi hala’o atividade iha baze hodi bele atende komunidade sira liuhusi matadalan ne’e, no mós livru ne’e bele fó ba pesoál saúde sira atu halo promosaun.
Tuir dadús husi servisu saúde RAEOA, hatudu katak husi Novembru 2024 mai to’o Marsu 2025 ne’e konsege deteta kazu 16, nune’e husi totál kazu lepra ne’e pasiente ne’ebé ativa iha tratamentu saúde na’in-23.
Notísia relevante:Servisu Saúde Oé-Cusse lansa estratéjia lima hodi kombate moras lepra
Jornalista: Abílio Elo Nini
Editor: Florencio Miranda Ximenes
