OÉ-CUSSE, 30 Janeiru 2025 (TATOLI)– Ministra Solidariedade Sosiál no Inkluzaun (MSSI), Veronica das Dores, fó-sai kontinua tau-matan ba pasiénte lepra na’in-23 iha Rejiaun Administrativa Espesiál Oé-Cusse Ambeno (RAEOA).
“Ha’u mai iha Oé-Cusse, partisipa espesiálmente ba loron mundiál lepra, tanba númeru moras lepra aas tebes iha RAEOA ho totál pasiente na’in-23. Tanba ne’e kontinua servisu hamutuk ho Ministériu Saúde (MS) ho Misaun Lepra Timor-Leste (TLTL) espesifikamente ho médiku sira atubele hatene saida mak ita-bele asegura ba pasiente sira-nia moris ba futuru liuliu tratamentu ba sira nia moras,” nia hateten iha Otél Ambeno, ohin.
Notísia relevante:MLTL husu hakotu estigma sosiál hasoru pasiente lepra
Iha tinan 2024, kazu lepra iha Oé-Cusse la’ós rezolve ona. Maibé sei kontinua sa’e,nune’e governu iha responsabilidade atu hala’o tratamentu ba pasiente no prevenesaun ba moras lepra.
“Ha’u-nia misaun espésifiku oinsá mak halo nutrisaun ba ai-han nutritivu ba sira, nune’e sira bele han hodi aumenta hemu ai-moruk, sela’e hemu ai-moruk afeta ba fatin seluk, ida-ne’e mak ha’u-nia misaun espsifikamente atu mai Oé-Cusse, atu-bele kombate, tanba iha moras tolu hanesan lepra, HIV-SIDA no TBC, moras tolu ne’e mak ita tenki esforsa atu redús,” nia afirma.
Ministériu Solidariedade Sosiál la servisu mesak, maibé servisu hamutuk ho Ministériu Saúde no Ministériu Agrikultura, atu prepara ai-han nutritivu ba pasiente sira.
Ministra mós nota katak presiza halo sosializasaun maka’as atu sidadaun sira labele halo diskriminasaun no estigma hasoru pasiente moras lepra sira.
Notísia relevante:Tinan ne’e, Servisu saúde Oé-Cusse mellora atendimentu ba pasiente moras hada’et
Iha biban hanesan, Prezidente Konsellu Misaun Lepra iha Timor-Leste, Dulce da Cunha, apela ba entidade hotu, presiza kolabora malu, nune’e bele redús kazu transmisaun no hapara diskriminasaun. Tanba bazea ba tema tinan ne’e mak “Mai ita unidade kura lepra ho dignu”.
“Ami presiza de’it mak unidade hodi bele luta hasoru moras lepra liuliu ba atinjementu zero tranformasaun, diskriminasaun ho defisiénsia, entaun atu atinje buat hirak-ne’e, presiza iha unidade no kolaborasaun. Tanba mehi husi misaun lepra, ba futuru atu elimina ka hamenus, ami-nia esperansa ba profisionál saúde sira, atu labele hakribi’i ita-nia maluk sira, maibé atende sira ho dignu nu’udar umanu,” nia dehan.
Tuir dadús husi Servisu Saúde RAEOA, hatudu husi Novembru 2024 mai to’o Janeiru 2024, konsege deteta pasiénta foun na’in-16, nune’e rejista pasiente ativa iha tratamentu saúde na’in-23.
Notísia relevante:MLTL formaliza akordu ho RAEOA hodi kombate moras lepra
Jornalista: Abílio Elo Nini
Editór: Florencio Miranda Ximenes
