BOBONARU, 15 Marsu 2025 (TATOLI)—Diresaun Servisu Munisipál Edukasaun husi Autoridade Munisipál Bobonaru, sábadu ne’e, lansa ona Programa Merenda Eskolár (PME) tinan 2025 ba totál estudante benefisiáriu hamutuk na’in-29.078 ne’ebé mai husi Ensinu Báziku Públiku no Katóliku.
Notísia Relevante: Koordenadór EBF Mabil-oa husu DSME aselera implementasaun PME 2025
“Ami nu’udár inan-aman agradese tebes ba governu. Maski programa ne’e la’o tarde maibé agora ami-nia oan sira bele merenda ona iha eskola. Programa ne’e di’ak tebes tanba ajuda ami inan sira iha dadeer-dadeer la presiza prepara ai-han, basá iha eskola preparadu ona,” Felismina dos Santo Gomes, reprezentante inan-aman estudante husi Ensinu Báziku Sentrál Raifun, informa ba jornalista sira, iha Raifun, Maliana.
Aleinde ne’e, Diretór EBC Raifun, Domingos Mendes, hateten programa ne’e iha vantajen di’ak tanba ajuda tebes estudante sira ativu iha sala-aula.
“Menú ida-ne’e iha duni nutrisaun di’ak no fó vantajen ba ita-nia estudante sira atu aprende ho di’ak. Ami sempre fó hanoin ba fornesedór sira atu prepara ai-han buka ai-han ida-ne’ebé fresku, ai-han ne’ebé mak ninia data sei válidu,” nia fó hanoin.
Tuir dadus ne’ebé Diresaun Servisu Munisipál Edukasaun rekolla katak estudante ho kuantidade 29.078 ne’ebé asesu Programa Merenda Eskolár tinan 2025 ne’e kompostu husi Ensinu Báziku no Pré-Eskolár públiku 26.516 no Ensinu Báziku ho Pré-Eskolár Katólika 2.562.
Programa ne’e implementa iha eskola públiku hamutuk 179 kompostu husi Ensinu Báziku iha 137, Ensinu Báziku Sentrál (EBC-sigla portugés) 23 no Ensinu Báziku Filiál (EBF) 114, Ensinu Pré-Eskolár 32.
Enkuantu, Ensinu Báziku no Ensinu Pré-Eskolár Katóliku hamutuk 24 kompostu husi EBC 6, EBF 10 no Ensinu Pré-Eskolár Katóliku 8.
Totál orsamentu PME ba tinan 2025 ne’ebé Autoridade Munisípiu Bobonaru aloka ba programa referidu hamutuk $1.758,783,60. Montante ne’e fahe ba Ensinu Báziku Públiku no Katóliku hamutuk $1.564,829,28 ho totál loron efetivu 141, entretantu Pré-Eskolár Públiku no Katóliku hamutuk $193,954.32 ba loron efetivu 174.
Notísia Relevante:Estudante rihun 29,078 iha Bobonaru sai benifisiáriu ba PME 2025
Jornalista: Sergio da Cruz
Editór: Xisto Freitas da Piedade
