KOVALIMA, 17 Marsu 2025 (TATOLI) – Autoridade Munisípiu Kovalima, segunda-ne’e, partilla informasaun kona-ba eloborasaun Planu Asaun Anuál (PAA) 2026, ba diretór servisu munisipál no administradór postu administrativu hitu, iha munisípiu Kovalima.
Sekretáriu Munisipál Administrasaun no Finansa, Alberto Moniz de Araújo informa, liuhusi enkontru ida-ne’e atu orienta diretór servisu munisipál no administradór postu administrativu hitu, prepara atu elobora PAA 2026 nune’e bele aprezenta iha sorumutu konsellu diretivu munisipál.
“Atu prepara elobora PAA 2026 ami organiza atividade hodi ko’alia kona-ba pontu tolu mak hanesan, pontu partida, mapamentu dirasaun rekursu umanu no kompeténsia ba dirijente servisu munisipál bazeia ba dekretu-lei númeru 3/2016, 16 Marsu, quinta alterasaun dekretu-lei númeru 84/2023, 23 Novembru”, Alberto Moniz de Araújo, hateten ba jornalista sira, iha salaun administrasaun Postu administrativu Suai, ohin.
Autoridade administrasaun finansa ne’e dehan, atu halo mapamentu hodi haree funsionáriu sira nune’e halo kolokasaun funsionáriu ba servisu munisipál sira ho balansu hodi prepara ba Planu Asaun Anuál (PAA) 2026.
Bazeia ba baze legál dekretu-lei númeru 3/2016 quinta alterasaun ba númeru 84/2023 kona-ba kompeténsia autoriade liga ba diploma ministeriál konjunta kontratu administrasaun interna entre ministériu relevante sira nune’e bele foti iha Sorumutu konsellu diretivu munisipál prontu aprezenta iha sorumutu konsellu diresaun nasionál.
Tuir planu, PAA 2026 aprezenta ba komite Revizaun Orsamentál (KRO) no ba Primeiru-Ministru no ministériu relevante sira, iha fulan-juñu iha tinan ne’e.
Ho nune’e hafoin enkontru, Asesór Partisipa sei guia dirijente servisu munisipál no Administradór postu administrativu hitu oinsá sira bele elabora PAA 2026.
Iha sorin seluk, Administradór Postu administrativu Fohorem, Delfim Amaral Ferreira, konfirma, partisipasaun iha enkontru ohin ne’e importante atu simu orientasaun husi munisípiu kona-ba atu elobora PAA 2026.
“Ami-nia preparasaun ba PAA, ida-idak elabora planu hodi prepara orsamentu 2026 hafoin ami aprezenta mai iha munisípiu elobora hamutuk hodi aprezenta ba iha nível nasionál”, nia reforsa.
Atu aprezenta PAA fó tempu ba autoridade postu sira atu submete ona PAA 2026 fó tempu iha loron 20 marsu ne’e husi postu administrativu tenke aprezenta ona mai iha munisípiu.
Jornalista: Celestina Teles
Editór: Rafael Ximenes de A. Belo
