DILI, 17 Marsu 2025 (TATOLI)–Prezidente Parlamentu Nasionál (PPN), Maria Fernanda Lay, preokupa ahi mate lakan bele estraga sasán eletróniku iha Parlamentu Nasionál (PN).
“Ahi mate lakan konsekuénsia iha ne’e ita-nia ekraun ekipamentu eletróniku la funsiona, ne’ebé hanoin la’ós povu baibain de’it maibé instituisaun Estadu Parlamentu rasik sofre konsekuénsia ida-ne’e,” PPN hato’o liuhusi reuniaun plenária PN, segunda ne’e.
Notísia relevante : https://tatoli.tl/2025/02/14/bankada-governu-bolu-urjente-edtl-e-p-esplika-kauza-ahi-mate-lakan/
Deputada Bankada Governu husi Partidu Demokrátiku (PD), Sancha Tilman, lamenta ho kondisaun eletrisidade ikus ne’e tanba estraga komunidade nia sasán eletróniku iha área Komoro.
Deputada Bankada Governu husi Kongresu Nasionál Rekonstrusaun Timorense (CNRT), Cedelízia Farria dos Santos, haktuir, iha semana kotuk bainhita hala’o fiskalizasaun ba Banku Nasionál Komérsiu Timor-Leste (BNCTL, sigla portugés) aprezenta mós kona-ba impaktu boot husi ahi-mate lakan ne’ebé estraga mós mákina ATM ne’ebé sosa ho kustu boot.
“Husu mós atensaun saida mak Prezidente Parlamentu hateten ona, ekraun ne’e foun ho kustu hira, populasaun barak mós nian,” nia preokupa.
Reprezentante Governu liuhusi Vise-Ministru asuntu Parlamentár, Adérito Hugo, lamenta tebes ba dezempeñu Eletrisidade Timor-Leste, Empreza Públika (EDTL, E.P), tanba ne’e polítika harii empreza sira mak IX Governu toma atensaun sériu atu re-define estatutu.
“Governu liuhusi Primeiru-Minstru haree ba pontu situasaun dezempeñu empreza públika sira iha setór atendimentu nesesidade públiku nian, mak orientadu ona ba ministériu relevante sira atu haree kestaun estatutu empreza ne’ebé subsídiu 100% husi orsamentu Estadu sein atividade ida di’ak no rejime salariál a’as kompara ho entidade sira seluk,” nia akresenta.
Jornalista : Nelson de Sousa
Editora : Julia Chatarina
