DILI, 18 Marsu 2025 (TATOLI)—Diretór Servisu Apoiu Diagnóstiku no Terapéutiku iha Hospital Nacional Guido Valadares (HNGV), Vidal Lopes, informa iha Abríl tinan ne’e médiku espesialista sira husi Austrália sei mai fó konsulta ba labarik sira hamutuk 100 iha HNGV.
“Hakarak informa ba inan-aman sira katak ba ita-nia alin sira no oan sira-ne’ebé mak moras bele hakbesik aan mai iha HNGV hodi konsulta, tanba iha visiting medical teams Austrália sei mai no sei reforsa mós hosi timoroan iha loron 01-11 Abríl, hodi fó tratamentu ba labarik sira-ne’ebé hetan moras husi parte isin nian,” Vidal Lopes tenik ba jornalista sira iha nia kna’ar fatin, Bidau, tersa ne’e.
Nia dehan, ekipa médiku sirurjia-pediatria hosi Austrália na’in-tolu mak sei fó konsulta ba bebé sira durante semana ida resin.
“Atu konsulta moras sira mak hanesan imperforate anus ka labarik moris ho kidun tomak, umbilical hernia hanesan bubu iha husar ka infesaun iha husar matan, anal polyp hanesan isin kulit mosu iha anus ka sintina fatin, hypospadia hanesan soe bee ki’ik la tuir nia dalan, konstipasaun krónika hanesan kabun bubu no konsulta ne’e espesifikamente ba labarik sira de’it,” nia haktuir.
Dirijente ne’e informa katak ekipa hosi HNGV sei halo identifikasaun, iha-ne’ebé la’ós pasiente hotu-hotu maibé ba labarik na’in-100 ne’ebé mak iha ona lista mak sei halo intervensaun, bazeia ba sira-nia pedidu ne’ebé mak iha.
“Iha loron 30-31 Marsu ne’e, ekipa sei halo screaning sira hodi identifika, la’ós pasiente hotu-hotu sira halo intervensaun, tanba númeru ne’e boot tebes kuaze na’in-100 ona,” nia esplika.
Vidal informa katak konsulta ida-ne’e hola parte ida hosi estratéjia ida nune’e bele redús pasiente tanba pasiente barak liu. Buat balun haruka ba rai-li’ur tanba rekursu umanu laiha no dalaruma modalidade diagnístika laiha, entaun hosi estratéjia ida-ne’e atu redús transferénsia ba rai-li’ur.
“Sira mai ho sira-nia ekipamentu sira-ne’ebé mak ita laiha sira lori mai no konsulta sira hanesan ne’e la’ós foin mak primeiravéz, maibé ida-ne’e beibeik ona, tuir pedidu ne’ebé mak ita presiza,” nia konklui.
Jornalista: Felicidade Ximenes
Editór: Xisto Freitas da Piedade
