KOVALIMA, 18 Marsu 2025 (TATOLI) –Prosesu konstrusaun Uma Naroman ba Povu (UNP) regular faze daruak iha 2022 , ne’ebé implementa iha Kovalima iha Postu administrativu Fohorem ho Fatumea seidauk entrega ba benefisiáriu sira.
Diretór PNDS Munisípiu Kovalima, Pedro de Araujo Gomes esplika, konstrusaun UNP regular iha postu administrativu rua seidauk entrega maske prosesu konstruisaun fíziku hotu ona, maibé presiza atu kompleta mobiliáriu.
“Konstrusaun UNP regular balun seidauk entrega ba benefisiáriu sira tanba presiza atu kompleta mobiliáriu mak hanesan iha Postu administrativu Fohorem no Fatumea kuaze suku tolu seidauk hotu razaun klima udan nune’e ita-nia empreza fornesedór materiál lori sasan uma laran labele ba tanba kondisaun estrada”, Pedro de Araujo Gomes, dehan ba TATOLI iha nia servisu fatin, ohin.
Tuir dadus PNDS Kovalima konstrui UNP regular faze daruak iha munisípiu Kovalima UNP unidade 278 ne’ebé finaliza ona konstrusaun fizika maibé hein kompleta mobiliáriu.
Durante PNDS implementa projete PNDS, PNDS sosa materiál konstrusaun loja sira iha Kovalima ne’ebé depende kolega sira husi tékniku postu ho ekipa suku sira peskiza loja ne’ebé materiál konstrusaun barratu.
Iha sorin seluk, Administradór Postu administrativu Fohorem Delfim Amaral Ferreira, relata katak, prosesu konstrusaun UNP regulár implementa, iha postu Fohorem konstrusuan fízika finaliza ona hein atu entrega.
“Iha postu Fohorem iha Suku Fohorem mak finaliza no iha suku Laktos, Dato Rua no Dato Tolu mak finaliza ona konstruisaun maibé seidauk entrega ba ita-nia benefisiáriu sira”nia klarifika.
Fó hanoin fali katak Ekipa PNDS konstrui UNP regulár 278 ne’e implementa iha Postu administrativu Fatululik,Fatumea, Fohorem,Tilomar, Maukatar, Suai no Zumalai no iha suku 30 ho totál orsamentu hamutuk $ 4,735,452.
Notísia relevante:Konstrusaun UNP plus A unidade ida iha Maukatar seidauk finaliza
Jornalista: Celestina Teles
Editór: Rafael Ximenes de A. Belo
