DILI, 18 Marsu 2025 (TATOLI)-Ministru Asuntu Kombatente Libertasaun Nasionál (MAKLN), Gil da Costa Monteiro Oan Soru, fó prazu loron-90 hahú 01 Abríl to’o loron-30 Juñu tinan ne’e ba Kombatente no Martir sira (rejistadu 2009) hodi kontinua submete dokumentu ba Konsellu Kombatente Libertasaun Nasionál (CCLN-sigla portugés) iha munisípiu sira.
“Sira ne’ebé dadus loos ona no laiha reklamasaun no kontestasaun ne’e, sira bele hatama sira-nia dokumentu ka resibu sira-ne’ebé sai liuhosi CCLN iha munisípiu sira hotu”, Oan Soru hatete iha salaun Maubai, Komoro, tersa ne’e.
Mesmu reklamasaun no kontestasaun estende tan ba fulan-ida. “Ami estende tanba karta lamentasaun no aproveitamentu primeiru rejistu ne’ebé pendente hela. Loron estensaun labele boot liu fali loron definitivu tuir lei haruka”.
Governante ne’e hatete munisípiu Baukau mak seidauk hatama dadus reklamasaun no kontestasaun, seluk hatama hotu ona. “To’o data ohin ami simu ona reklamasaun no kontestasaun 35.617. Dadus ne’e mai hosi munisípiu hotu-hotu menus Baukau nian mak ohin seidauk lori mai”, dehan.
Diretór Pensaun no Subvensaun, Manuel Araújo do Santos, atualiza mós desizaun hosi nivel aas ka ministériu ho konsellu kombatente libertasaun nasionál nian ne’ebé deside ona iha segunda (17/03/2025) kona-ba periúdu sira ba reklamasaun ninian, iha ne’ebé deside ona hodi extende loron 30 tán.
Notísia relevante: MAKLN estende reklamasaun no kontestasaun inklui dokumentu pendente 2003
Jornalista : Osória Marques
Editora : Rita Almeida
