DILI, 18 Marsu 2025 (TATOLI)-Governu liuhosi Ministériu Asuntu Kombatente Libertasaun Nasionál (MAKLN), tersa ne’e anúnsia katak semana oin loke vaga ka programa bolsa estudu ba kombatente no Martir Libertasaun Nasionál nia oan sira hodi asesu ba edukasaun iha nivel eskolaridade.
MAKLN, Gil da Costa Monteiro “Oan Soru”, hatete atribuisaun bolsa estudu kombatente no Martir Libertasaun Nasionál sira nia oan sei hahú iha 24 fulan-Marsu tinan-2025 no remata 22 fulan-Abríl tinan-2025.
“Programa Bolsa Estudu 2025, MAKLN ho CCLN sei oferese de’it ba Kombatente no Martir sira ne’ebé rejistadu iha 2003 no 2005. Segunda faze ne’ebé rejistu iha 2009 seidauk bele simu, tanba dadus reklamasaun ka kontestasaun foin prosesa, nune’e sira ne’e sei tama fali iha tinan 2027”, Oan Soru dehan iha salaun Maubai, Komoro.
Kritériu jerál ba Bolsa Estudu ida-ne’e atribui de’it ba oan husi Kombatente Libertasaun Nasionál sira ne’ebé mate tanba partisipasaun iha luta ba libertasaun nasionál.
Governante ne’e dehan Bolsa Estudu ne’e ba Kombatente Libertasaun Nasionál sira ne’ebé editadu ba Pensaun Espesiál Subsisténsia ka Pensaun Espesiál Reforma husi rejistu dahuluk. Nune’e tinan-tinan, ministériu rekruta kandidatura ba programa hamutuk 1.300 no kada munisípiu sei hetan 100.
Bolsa Estudu 1º Siklu Ensinu Báziku iha na’in 65, maka kada munisípiu presiza de’it na’in-lima. Bolsa Estudu 2º no 3º Siklu Ensinu Báziku hamutuk 195, kada munisípiu presiza na’in-15.
Bolsa Estudu Ensinu Sekundáriu hamutuk 325 no kada munisípiu presiza na’in-25. Bolsa Estudu ba Ensinu Superiór iha rai-laran hamutuk 650 no kada munisípiu presiza 50 no ensinu superiór ba rai-li’ur hamutuk 65 no kada munisípiu presiza na’in-lima.
Orsamentu Bolsa Estudu ba 2025 hamutuk $1.127.750.
Notísia relevante: 2024: MACLN atribui bolsa estudu ba veteranu nia oan 1.300
Ho programa ne’e, tempu hanesan ministru mós loke formasaun téknika konaba bolsa estudu 2025 ba kombatente no martir libertasaun nia oan.
Formasaun téknika ida-ne’e atu eleva koñesimentu sekretáriu ezekutivu, pontu vogál no tékniku sira husi munisípiu konaba oinsá atende kandidatu sira iha terenu.
“Formasaun no preparasaun bolsu estudu ba kombatente nia-oan sei hahú iha Marsu no ramata iha 22 Abríl”, Oan Soru dehan.
Oportunidade ne’e, Oan Soru enkoraja partisipante formasaun atu responsabiliza kna’ar tuir lei bainhira implementa regra sira iha terenu, liuliu prosesu selesaun dokumentu sira tenke rigor.
“Tenke prenxe kritériu, valór mínimu ne’e hira, valór médiu ne’e hira, no valór másimu ne’e hira”, hatutan.
Hafoin formasaun, tékniku sira ho diresaun nasionál baze dadus-nian, sei haruka ekipa sira akompaña tékniku Konsellu Munisipál Kombatente Libertasaun Nasionál.
Sekretáriu Estadu Veteranu (SEV), Cesar dos Santos da Silva Merak, dehan sekretáriu ezekutivu sira no mós tékniku sira ne’ebé tama iha konsellu kombatente libertasaun nasionál hala’o servisu ho di’ak.
“Husu ita-boot sira, fó prestasaun servisu, hatene dekor múzika Hinu Nasionál, Hinu Veteranu. Hatene dekor para kanta, no mós tenke interpreta”, Merak fó hanoin.
Diretór Pensaun no Subvensaun, Manuel Araújo dos Santos, hatete tékniku sira ne’ebé partisipa formasaun kada munisípiu ema na’in-haat, menus Lautein ho Dili. Formasaun sei foku liu ba prosesamentu rekerementu sira hosi pensaun no prestasaun únika.
Formasaun ne’e rasik la’o durante loron rua, hosi 18 to’o 19 Marsu 2025. Matéria sira ne’ebé sei hetan iha formasaun loron dahuluk maka lei númeru 3/2024, loron 12 fulan-juñu, terseira alterasaun ba lei númeru 3/2006, loron 12 fulan-abríl, estatutu kombatente sira nian ba libertasaun nasionál.
Matéria seluk mak dekretu-lei ba pensaun, dekretu-lei númeru 8/2009, loron 15 fulan-Janeiru, kona-ba rejíme hodi halo atribuisaun Bolsa Estudu sira ba Kombatente no Martir sira ba Libertasaun Nasionál nia oan sira, inklui despasu ministeriál númeru 3/MACLN-IXGC/II/2025, kona-ba vagas no montante Bolsa Estudu 2025 nian, ho manuál prosedimentu bolsu estudu tinan letivu 2025.
Notísia relevante: MAKLN prevee millaun $1,1 hodi fó bolsa estudu ba veteranu nia oan
Jornalista : Osória Marques
Editora : Rita Almeida
