OEKUSI, 20 Marsu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) lihusi Diresaun Rejionál Infraestrutura (DRI), planu loke fali konkursu públiku foun ba projetu estrada nasionál ho pakote A husi ponte Noefefan, suku Lifau to’o Oénunu, suku Suni-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA), nune’e bele halo kontinua konstrusaun tanba durante ne’e paradu.
Diretór Diresaun Rejionál Infraestrutura (DRI), Remigío Nuno Sila, informa iha tinan 2024, Autoridade RAEOA halo ona xamada ba empreza no hapara kedan projetu estrada pakote A husi ponte Noefefan bá Oénunu tanba halo konstrusaun la tuir rekezitu iha teste materiál
Notísia relevante:ADN sobu ona projetu estrada husi ponte Noefefan-Oenunu
“Signifika projetu estrada ne’e to’o agora laiha atividade no paradu hela tanba iha avaliasaun ida kona-ba teste materiál husi kompañia Waskita la kompleta rekezitu, entaun ita tenke hapara kontratu. Tan ne’e koordenasaun DRI hamutuk ho Ajénsia Dezenvolvimentu Nasionál (ADN) sei tuun fila-fali ba terrenu atu observa no verifika materiál sira-ne’ebé iha, nune’e iha tempu badak ita sei loke fali konkursu públiku foun,” nia dehan iha Oekusi, ohin.
Kona-ba prosesu pagamentu, kompañia hetan ona direitu tuir progresu servisu tanba projetu ne’e manán ho verba milllaun $23. “Agora nia pagamentu mós bazea progresu servisu ne’ebé projetu ne’e atinje ona 54%, pagamentu mós bazea ida-ne’e,” nia fó sai.
Molok ne’e, iha fulan-Jullu 2024, Governu liuhusi Ministériu Planeamentu no Investimentu Estratéjiku (MPIE) akompaña husi Ajénsia Dezenvolvimentu Nasionál (ADN) hamutuk ho Autoridade RAEOA, orienta kompañia Estatál PT.Waskita Karya sobu fali projetu estrada kilomentru neen (6) inklui alkatraun kilometru tolu (3) husi ponte Noefefan liga bá Oénunu tanba ho razaun la kumpre padraun Bill of Quantity (BoQ).
Rekorda fali katak estrada pakote A husi Ponte Noefefan bá Oénunu, sub-rejiaun Nítibe, Autoridade RAEOA hatu’ur fatuk dahuluk iha loron 19 Agostu 2022 no kompañia Waskita Karya ezekuta ho distánsia kilómetru 11 ho valór kontratu millaun $23.
Notísia relevante:Utilizasaun materiál ba konstrusaun estrada Noefefan-Oénunu la tuir BoQ
Jornalista: Abílio Elo Nini
Editór: Florencio Miranda Ximenes
